عوريان زار اولدوم يئنه
مجنونا باخ، مجنونا باخ!
سلطان غار اولدوم يئنه
هامونا باخ، هامونا باخ!
داش أوسته قويدوم باشيمي
تؤکدوم عمانه ياشيمي
توفان نوح اولدوم يئنه
جيحونا باخ، جیحونا باخ!
وحشی یاتاغی منزلیم،
قوشلار یوواسی کاکیلم!
افعی ألیمده اوینارام،
افسونا باخ، افسونا باخ
سالدی منی دیلدن دیله
دوشدو ایشیم چوخ موشگوله
ای مرغ جان! بو دیده ی
پـرخونا باخ، پـرخونا باخ!
سالدیم اوجاغا مصحفی
ساز ائیله دیم چنگ و دفی
بوینومدا بیر زونـّاری گـؤر
ملعونا باخ، ملعونا باخ!
سولدو، خزان، اولدو گولوم
دوشدو نوادان بولبـولوم
بیردم منی شاد ائتــمه دی
گـردونا باخ، گردونا باخ!
آلــــدی ألیمدن یاریمی
آرتیردی آه و زاریمی
هر ایلده بیر داغ آرتیرار
قانونـا باخ، قانونـا باخ!
کئچدیم فلکدن،کیمدیر او
دورسـون منیمله روبه رو؟
یوزمیـــن خزینه م وار منیم
قارونـا باخ، قارونـا باخ!
قویما ألینـدن تیشـه نی
تؤک داغا بو اندیشه نی
فرهـاد شیرین دیر گلن
گولگونا باخ، گولگـونا باخ!
قـوربان وفالی یارینا
عاشیق سئون دلداریـنا
وه!وه! عجب شبرنگ ایمیش
شبخونا باخ، شبخونا باخ!
قندی نباتـی تؤک دوزه
گل بیر تماشا قیل سؤزه
بیر گؤر نه گؤوهر دوزموشم
مضمونا باخ، مضمونا باخ!
سورما نباتی دن خبر
کیم بو کلامی کیم دئیه ر؟
دور بیر نـظر اول قامت
موزونا باخ، موزونا باخ !
About Author
پست های مرتبط
ادای احترام سران قوا و مسئولان ارشد کشور به پیکر امام شهید
تصاویر دیده نشده از شهید آلهاشم
کاریکاتور روز/ کنترل تخلفات ساختمانی در تبریز به کمک پهپاد