یاشیل فضادان بیر تحفه

شقایق

چؤل لاله سی یا شقایق گولو ، بیر ایللیک بیتگی لردندیر. اوجالیغی اوتوز سانتیمئتیره دک یئتیر.
یارپاقلاری بؤلوک بؤکوک و یئر کؤکو یارپاغینا اوخشاردیر.
گوللری نین دؤرد گول یارپاغی واردیر و هردن بئش دن سگگیز دانایا دک ده گؤرسه نیبدیر. گول یارپاقلاری ، نارینجی ، قیرمیزی، ساری، کرم، صورتی ، آغ و گاهدان ایکی رنگ ده گؤزه دَییر.
بو بیتگی نین گوللری گونش ساچاندا آچیر و گون ایشیغی آزالدیقجا یا بولوت اولاندا و گئجه چاغلاری یومولور.
بیر نوع کالیفرنیا شقایقی واردیر کی اونون اصل دوغوم یئری کالیفرنیا اؤلکه سی نین چؤللری دیر و گوللری نین رنگی یاز فصلینده نارینجی یه چالیر، آمما یایدا کیچیلیب، رنگی آزالیر.
بو نوع بیتگی یازین ایلک آییندان، سون آیینا دک گول آچیر.
اؤلوشگه یه ن گوللری قیرماق ایله، گول وئرمه ک زامانین اوزالتماق اولار. هاوا یاخشی اولاندا ، ایکی آی یا اوچ آیا دک دال با دالا گوله دولور.
بو بیتگی نین گونه وه ر یئره نیازی واردیر.
تورپاغی گره کدیر یونگول و قوملو اولسون.
سویوقا داوامی واردیر و پاییزین ایلک آییندا اکمه ک اولار.
ضعیف تورپاقدا دا بیتیر و آز کود ایسته ییر.
اگر بیر زاماندان سونرا گؤرسه ک بو بیتگی نین قوللاری چوخ اوزانیر ، قوللارین داللایاریق ، یئنی دن قولا دولار.
چؤل لاله سی ، توخوم یولو ایله چوخالار. چون سویوقا داوامی واردیر ، پاییزین ایلک یا ایکینجی آییندادا اکمه ک اولار. توخوم ال ایله سه پیلیر. سونرا تَکله مَگه نیازی اولور .
بو بیتگی نین توخومو یئره سه پیلندن دؤرد آی سونرا گوله گئدیر.
ایسته سه ک یاشیل فضالاردا ، یاز فصلینه مربوط اولان طرح لرده و یا گول فرش لرینده بو نوع بیتگی دن فایدالانا بیله لریک.
چؤل لاله لری نین قیرمیزی نوع لارین ، اؤز اؤلکه میزده ، جلفا چؤلونده یا قارا داغ چؤللرینده و یول قیراقلاریندا گؤروروک .
سهند داغی نین اَته کلری ، هریس مشگین یولو و بابک قلعه سی نین اَته گی کیمی یئرلرده هر جوره رنگده – یاز فصلینده گؤزه دَییر و داهادا آرتیق طبیعتین و یاشیل فضانین گؤزه للیگینه آرتیریر.
چوخلو آداملار چؤله دولانماغا گئدنده ، چؤل لاله لرینه گؤره گئده رلر. اینسان بو طبیعتین گؤزه للیگیندن لذّت آپاریر. آنجاق ایسته سه ک طبیعتین و یاشیل چؤلون گؤزه للیگین پارک لارا ،ائو باغچالارینا ، ویلالارا و شهر ایچینده گؤز قاباقلارینا گتیره بیله ریک.
بو نوع بیتگی یاز فصلی نین سون آییندا دوزگون توخوما دولور و او زامانی توخوملاری دولو اولار. اگر توخومون دوتاق و گتیریب گونه وه ر یئرده اَکیب بئجه رده ک ، چوخ دا آسان بیتیب بیزه گول وئره جکدیر. بو نوع چؤل گولونون ایسته یی آزدیر. معمولی باغچا تورپاغیندا دابیته ر .
چوخ واختلار ، یازین یاغیش سویونادا قانع اولاراق گوله دولور ، آمما یاغیش یاغمایان گونلرده یئرین قورو گؤردوکده سووارماغیمیز واجیبدیر.
چؤل لاله سین ، سوواراندا آییق اولون گؤیدن سو سه پمه یین ، چونکی گؤیدن سو سه پمه ک ، گول یارپاقلاری نین تؤکولمه سینه سبب اولار. نئجه کی یاغیش بَته ر یاغاندا گول یارپاقلاری نین تؤکولمه سین گؤروروک. پس یاخشیدیر کوُلون دیبیندن سو وئره ک.
ایسته سه ز بو گولو اؤز باغچازدا بئجه رده سیز . تورپاغین دوزگون بئلله ییب بوشالدین و اگر گؤرسه ز یئرین اَت تورپاغی چوخدور ، بیر آز قوم قاتین!
سونرا یئرین هامارلاییب ، سئیره کدن توخوم سه پیب ، ال ایله اوزدن دیرمیق وورون.
توخوم گره کدیر چوخ تورپاغین آلتیندا قالماسین . آز لایه تورپاق توخومون اؤستونه تؤکولسه گؤره ر.
توخومو اکه ندن سونرا ، یالنیز سو سه پَن ایله بیر حالدا آرامجا سو وئرین کی تورپاق شئهله نسین آمما گؤل له نیب توخومو باتیرماسین !
قایناق: اینترنت
جامع ترین ژورنال گل و گیاه ایران
چئویریب آرتیران: الف.عظیمی بیلوردی

About Author

saghi

See author's posts