خرزهره

بو همیشه یاشیل بیتگی نین اوجالیغی ایکی مئتیردن اوچ مئتیره دک اولار. البتّه آلچاق نوعلاری دا واردیر کی اوجالیغی بیر مئتیردن آز اولور. بو بیتگی یاشیل دیوار جورله مه ک اوچون و یئلی سیندیرماق اوچون یاخشیدیر. چون بو بیتگی نه تکجه برک اسه ن یئللرین قاباغین آلیر بلکه دوزلو یئللرین قاباغیندادا داوامی چوخدور .
گوجلو بوته سی واردیر کی اوچ یا دؤرد ایللیگینده قدّینه دولوب گوله بویانیر. گول وئرمه ک دؤره سی اوزوندور و گؤزه ل ، سئویملی چیچکلری واردیر. آنجاق آییق اولون کی خرزه سمّ لی دیر. باغلاریزدا بو بیتگی دن اولسا اوشاقلاریزا تاپیشیرین چوخ اللرین ووروب و گوللرین اللرینده اوغوشدورماسینلار. حتّی بو بیتگی نین آغاجی گره کدیر ائوده یانمایا ، چون توستوسو عذا یا گیره ر و سمّ یارادار.
بو گول ، چوخ سویوق اؤلکه لره اویغون دئییل. خرزهره ایستی اؤلکه لرده یاخشی بیتیر. آمما دونمالی هاوایادا بیر حدده جه ک دؤزومو واردیر. بیر لوت زمی ده اگر اونا یاخشی سو وئریلسه بیته ر .
یاخشی بیتمه ک اوچون کامیل ایشیقا و گونه وه ر یئره نیازی واردیر. یئلی چوخ اولان یئرلرده داوامی چوخدور.
بو بیتگی هر نوع تورپاقدا بیته ر ، تکجه آغیر و همیشه زیغ اولان تورپاغی سئومه ییر.
یونگول تورپاقدا کی زیغ قالمایا یاخشی یئکه لیر.
بو گولون چوخالتماق یولو پیل وورماقیله مومکوندور.
پاییزدا آزجا بَرکیمیش قوللاریندان که سیب پیل وورارلار و پیللری راحاتلیق ایله کؤتوک سالار.
بو گؤزه ل بیتگی نین سوسوزلوغا داوامی واردیر آمما قورو هاوادا گاهداندا دَرین سووارماق لازیم گؤرونور.
بو بیتگی اوچون چوخ کود وئرمه ک لازیم دئییل. آمما اگر گؤرسه ک تورپاق چوخ قوملو و یوخسولدور ، یازین ایلک آییندا بیر دؤنه کامیل کود وئره ریک.
بو بیتگی نین موشگوللریندن :
گاهدان سپردار حشره لرین چاپیب تالاماغیندا اؤز داوامین الدن وئریب سوُزالیر ، اونا گؤره یاخشیدیر ، قیشدا « یاغ » سمپاشلیقی اولسون . بو بیتگی بیر آیری ناخوشلوقدا دوتار کی آدی «باکتریایی قال » دیر کی بیتگی نین قوللاریندا و چیچک لرینده یاریق سالار . بئله یاریقلی قوللاری گره کدیر واختیندا داللایاق و داللامامیش دان قاباق قئیچینی ضدّ عفونی ائده ک .
بو بیتگی معمولاً یازین اوّلیندن یایین سونونا دک گوله دولار .
حتّی پاییزدادا گول وئره ر .
یاخشی دیر کی خرزهره نین قوللاری نین اوجون یاز چاغیندا داللایاق.
ایستی یئرلرده داللاماغین لاپ یاخشی چاغی ، گولدن دوشن واختدیر.
اوندا پیر پیتلاشیق قوللاری بیر جور داللایین کی یاخشی پئروبا دوشسون!
بو بیتگینی آپارتومان و ائو هاواسیندا ( گونه وه ر یئرده ) یئکه گولداندادا ساخلاماق اولار.

About Author

saghi

See author's posts