یازیر!

ماوی اولدوزلارا نه دئییب اینسان
سانکی عاشیق اولوب بوتون آسیمان
آلتین قلم آلیب سامان یولوندان
محبت شعرینی داغلارا یازیر
خولیالی غمزه لر ، نازلی گولوشلر
شیرین تبسسوم لر، دوزلو گولوشلر
آلوولو باخیشلار ،سؤزلو گولوشلر
گؤروش وعده سینی ایلقارا یازیر
اؤزونو زیروه یه ازدیره ن بولود
نازلی گلین کیمی سوزدوره ن بولود
سمادا کؤهلنين گزدیره ن بولود
کامان قاشلاریندا آی پارا یازیر
مئشه لیک مورگولو،کؤلگه لیک سرین
تنهالیق باغریمدا قوروب چنبرین
باشیمدا بولودلو خاطیره لرین
یاغیشلار ایچیمده آستارا یازیر

About Author

saghi

See author's posts