دئیین او بالاجا قیزا … !

دئییــــن او بالاجا قیزا:
داریخیر رسیم دفترین.
گل سینه‌سین سن ناخیشلا،
نئجــــــولدو بالاجا الین؟!
***
گتیـــر بـویا قـــلم‌لـــــرین
گونش گولسون رسیمینده!
او بالاجا دودکــــــش یئنه
توستـو وئرسین ترسیمینده.
***
چکدیگین خیرداراق ائوین
یانیلی اولسون چیــــــراغی.
آدامــــلاری گول‌لر کیمی
گولوشسونلر سحر چــاغی.
***
او شن ائوین باغچاسینــــدا
بوللو- سوللو گول چیچک چک!
گــــــول‌لرینین ده اوستـــونده
رنگلی- رنگلی کپه‌نک چک!
***
ماوی اولسون ائویـن گؤیو،
ایچینده پامبیق بولـــــودلار.
گولوم! گله‌جک صاباحلار
سنی اؤپـــــر، سنی قوتلار.
***
بو ســؤزلری دانیشــــــدیقجا
آلیشیــــــردی، کؤوره‌لیردی.
یازیق دفتـــــر، یالقیـــز دفتر
خیسین- خیسین یاش الیردی:
***
اینانمیـــرام دئدیلر کی،
ائویزی طوفان قوپاردی.
اینانمیـــرام دئدیلر کی،
الینی کولـــک آپاردی.
***
سوتول رؤیــانی اینانمـام
قارا داشـــلارا یازیـلدی.
اینانمیرام، یوخ نازلیـجام
آرزونا قبیــــر قازیلدی.
***
لای – لای یارالی بنـــــؤوشه‌م،
لای – لای سوزولن اولـدوزوم!
لای – لای آرزولاری ایتَــــن،
لای – لای شیرین دیللی قیزیم!

About Author