گؤیچک فاطمانین ناغیلی

بيري وار ايميش، بيري يوخ ايميش، بيرجه كيشي وار ايميش، بو كيشي­ نين بير آروادي و بو آرواددان فاطما آديندا بير قيزي وار ايميش. فاطما چوخ آغيللي و گؤزل قيز ايميش. بير گون فاطمانين آناسي ناخوشلايير و قيزينا دئيير كي، من اؤلندن سونرا ده­ ده­ ن تزه آرواد آلاجاق، او آرواد دا سني چوخ اينجيده­ جكدير. آمما قارا اينه ­ييميزدن موغه ­يييت اول، اونو اؤزون اوتار.
قيزين آناسي اؤلور و ده­ ده ­سي گئديب اؤزگه بير آرواد آلير. بو آروادين دا ايرليكي اريندن بير چيركين قيزي واردي.
آرواد گؤيچك فاطماني چوخ دؤيوب اينجيديرميش. فاطما صبير ائديب، هر گون قارا اينه ­يي آپارارميش اوتارماغا. فاطمانين آناليغي اونا يون، داراق وئررميش كي، چؤلده اييرسين. فاطما يونو وئررميش اينه ­يين آغزينا. قارا اينك يونو اودار، سونرا حاضير ايپي آغزيندان چيخاريب وئررميش فاطمايا.
بير گون فاطما يون داراديغي يئرده كولك اونون الچيمينين بيريني گؤتوروب قالخيزدي هاوايا. فاطما بونون دالينجا يورويوب دئدي:
– قانادينا قوربان، يئل بابا، الچيميمي سال، بابا!
يئل اونون الچيميني بير باجادان سالدي. فاطما ائوه گيريب گؤردو كي، بورادا بير هئيبتلي قاري اوتوروب، آلت دوداغي يئر سوپورور، اوست دوداغي گؤي. قاري قاباغينا بير قورباغا قويوب اونو سيغاللايير. بو، دئو آناسي ايدي.فاطما قاري­يا باش اييب دئدي كي، منيم الچيميمي وئر.
قاري دئدي:
– گل باشيما باخ، سونرا وئريم.
فاطما اونون باشينا باخاندا گؤردو كي، ايلان- قورباغا ايله دولودور.
قاري سوروشدو:
– منيم باشيم ياخشيدي، يا آنانين باشي؟
فاطما جاواب وئردي كي، سنينكي ياخشيدير.
قاري سوروشدو:
– بو قورباغا گؤيچكدير، يوخسا اينسان؟
فاطما دئدي:
– كؤنول سئون گؤيچكدير.
فاطمانين سؤزلري قارييا خوش گلدي. قاري اونون الچيميني وئريب دئدي:
– گئدرسن، قاباغينا بير آغ سو، بير قارا سو و سونرا بير قيرميزي سو چيخاجاق. آغ سودا چيمرسن، قارا سو ايله ساچيني يويارسان، قيرميزي سودان ياناقلارينا سورترسن.
بيرده قاري اؤز توكوندن وئردي و دئدي كي، من سنه لازيم اولسام، يانديرارسان، يانيندا حاضير اولارام.
فاطما توكو گؤتوروب، نئجه كي، قاري دئميشدي ائله­ ده ائله دي. قاباقجا آغ سودا چيمدي، سونرا قارا سودا ساچلاريني يودو و قيرميزي سودان گؤتوروب دوداغينا، ياناقلارينا چكدي. ائله گؤيچك اولدو، ميثلي و برابري تاپيلمادي.
آناليغي فاطمانين گئج گلديييني گؤروب قيزينا دئدي:
– چيخ، گؤر فاطما نئج اولدو.
قيزي چيخيب گؤردو كي، فاطما گلير، آمما ائله گؤزللـه­شيب كي، آدام باخاندا گؤزو قاماشير.
فاطما ائوه گلنده آناليغي اونو دانلادي. قيزين گؤزللييني گؤروب سوروشدو:
– هارادا سن بئله گؤزل اولدون؟
فاطما باشينا گلني آناليغينا سؤيله ­دي، او دا صاباحيسي گون فاطمايا دئدي كي، ايندي سن ائوده اوتور، قوي بو گون­ده منيم قيزيم گئتسين اينه­ يي اوتارماغا. آنا اؤز قيزينا يون، داراق وئردي. يئل بونون دا الچيميني گؤتوروب قاچيردي و گتيردي همين دامين باجاسيندان سالدي. قيز الچيمين دالينجا يويوروب ايچري گيردي و قارييا دئدي:
– الچيميمي وئر.
قاري دئدي:
– باشيما باخ، سونرا وئريم.
قيز اونون باشينا باخاندا قاري سوروشدو:
– منيم باشيم ياخشيدير، يوخسا ننه­ نين باشي؟
قيز دئدي:
– سنين باشين پيسدير، ننه­ مين باشي ياخشيدير.
قاري­نين بونا آجيغي توتوب دئدي:
– گئدرسن قاباغينا بير آغ سو چيخار، بير قارا سو. قارا سودا چيمرسن، آغ سودا باشيني يويارسان.
قيز آغ سودا باشيني يويوب، قارا سودا چيمدي، داها دا چيركين و كيفير اولدو. آناسي بونو گؤروب فاطمايا برك آجيغي توتدو و حيرصيندن آز قالدي چاتلاسين. فاطمانين آجيغينا ايسته­ دي اونون اينه­ ييني اؤلدورسون. چونكي ايشلرين باشي اينك ايدي.
بير گون آرواد دالينا بير-ايكي لاواش باغلاييب، اوزونه زعفران چكيب گيردي يورغان-دؤشه ­يه .اري ائو گلنده بير او يانا، بير بو يانا دؤندو، لاواشي داليندا قيردي.اري سوروشدو:
– آرواد سنه نه اولوب سوموكلرين ائله شاققيلدايير و رنگين بئله ساراليبدير؟
آرواد دئدي:
– برك ناخوشام، اؤلورم، قارا اينه ­يي گرك كسه­ سن. من اونون اتيندن يئسم، بلكه ديريلم.
كيشي ايسته­ مه­ دي فاطمانين اينه­ ييني اؤلدورسون. آمما علاجي كسيليب دئدي:
– قوي فاطما ائودن بير يانا گئتسين، اينه ­يي كسيم.
اينك بونلارين فيكريني قانيب فاطمايا دئدي:
– مني كسه ­جكلر. آمما سن منيم اتيمدن يئمه و سوموكلريمي ييغيب بير يئرده باسدير. هر واخت ايسته­سن گل او يئره ، اوستونو آچ، اورادا بير دست پالتار و بير جوت قيزيل باشماق تاپارسان.
فاطما اينك ايله ائوه قاييداندا آتاسي اونو ايش دالينجا گؤندريب اينه­يي كسدي. فاطما قاييديب اينه­ ييني اؤلموش گؤروب چوخ آغلادي. هاراي هارا چاتاجاقدي؟ اينه ­يين اتيندن هئچ يئمه ­دي و سوموكلريني ييغيب بير يئرده قويلادي.
صاباحدان خبر چيخدي كي، پاديشاهين اوغلونا توي اولور. فاطمانين آناليغي يئره بير چاناق داري سپيب دئدي كي، بونلاري بير- بير ييغارسان چاناغا. يانيندا بير كوپ­ده قويوب دئدي: بونو دا آغلاييب گؤزونون ياشي ايله دولدورارسان. اؤز قيزيني دا گئيينديريب-كئچينديريب آپاردي تويا.
يازيق فاطما غمگين اوتوروب باشلادي آغلاماغا. بيردن قاري يادينا دوشدو. او وئردييي توكو يانديردي. همين ساعات قاري حاضير اولدو. فاطما باشينا گله ­ني اونا سؤيله ­دي. قاري دئدي:
– غم يئمه ، تئزليك ايله هاميسي باشا گلر.قاري آياغيني ووردو يئره . او دقيقه يئردن بير تويوق يانيندا جوجه لري ايله چيخدي، داريني تميز دنله­ ديلر، چاناغي قارينين گتيردييي باشقا داري ايله دولدوردولار.
قاري فاطمايا دئدي:
– كوپو ده تميز سو ايله دولدوروب ايچينه بير اوووج دوز تؤك، او دا اولسون گؤزياشي.
سونرا فاطما ايله قاري گئتديلر اينه­ يين سومويو باسديريلان يئره . بوراني قازيب گؤردولر كي، بير دست ظريف ايپك پارچادان ليباس و بير جوت قيزيل باشماق چيخدي. بورادا چوخلو قيزيل دا واردي. قاري ليباسي، باشماغي گئيينديردي فاطمايا و بير آز قيزيل، بير آز دا تورپاق گؤتوروب فاطما ايله گئتديلر تويا.
بورادا قاري دئدي:
– بو قيز منيم نوه مدير، قويون بو دا اويناسين.
او، فاطمانين بير اووجونا قيزيل، بير اووجونا دا تورپاق قويوب تاپشيردي كي، آناليغينين طرفينه اويناياندا اونلارين اوزونه تورپاق سپ، اؤزگه لرين طرفينه اويناياندا قيزيل.
فاطما دا چوخ گؤزل اويناييردي. هامي اونون اويناماغينا عاشيق اولدو. آمما آناليغي طرفه اويناياندا تورپاق سپدي، اؤزگه لري طرفه اويناياندا قيزيل. اويناياندان سونرا فاطما تله ­سيك قاييتدي ائو. چوخ تله ­سدييينه گؤره كؤرپودن كئچنده باشماغينين بير تاييني سالدي سويا.
فاطمانين آناليغي تويدان قيزي ايله قاييديب گؤردو كي، فاطما ائوده اوتوروب، اؤز تاپشيرديغي ايشلري ده يئرينه يئتيريب. او چوخ غضبلي ايدي.
فاطما سوروشدو:
– آي آنا، تويدا نه گؤردونوز؟
آناليغي آجيقلي دئدي كي، هئچ زاد گؤرمه­ ديك، بير گونو قارا گلميش قيز چيخدي، اوينادي، اؤزوده سنه اوخشاييردي. بيز طرفه اويناياندا تورپاق سپيردي، اؤزگه ­لري طرفه اويناياندا قيزيل- گوموش سپيردي.
فاطما دئدي:
– من ائودن چؤله چيخماميشام، سن بويوردوغون ايشلرين دالينجا اولموشام.
بير گون پادشاهين اوغلو اووا چيخدي. كؤرپونون يانيندان كئچنده ايسته ­دي كي، آتينا سو وئرسين. آت سويا ياخينلاشاندا خوررويوب سو ايچمه­ دي. پادشاهين اوغلو آدام سالديريب چايي آختارتدي. اونون ايچيندن بير قيزيل باشماق تاپديلار. باشماق چوخ ظريف ايدي. پادشاهين اوغلونا چوخ خوش گلدي.ايسته دي كي، نه طؤور اولسا، آختارديب اونون يييه ­سيني تاپسين و اؤزونه آلسين.
چوخ گزديلر، تاپماديلار. جارچيلار جار چكنده فاطمانين آناليغي ائشيتدي، اونون ال-آياغيني باغلاييب سالدي تنديره و اؤز قيزي­نين آياقلاريني يويوب قازيدي.پادشاهين آداملاري آختارا-آختارا گليب چيخديلار فاطما گيلين ائوينه . چيركين قيزين آياغينا باشماق گئيديرديلر، اولمادي. سوروشدولار كي، سيزين ائوده اؤزگه قيز يوخدورمو؟ فاطمانين آناليغي جاواب وئردي كي، يوخدور. آمما فاطمانين بير خوروزو وار ايدي، بو خوروز باشلادي بانلاماغا:
فاطما باجيم تنديرده ،
آياقلاري كنديرده !
آرواد نه قدر ايسته­ دي خوروزو قووسون، اولمادي. خوروز سيچرادي دامين اوسته ، اوجا سس ايله بانلادي:
فاطما باجيم تنديرده ، آياقلاري كنديرده !
پادشاهين آداملاري بونو ائشيديب، تنديره باخديلار گؤردولر كي، بونون ايچينده بير گؤزل قيزال-آياغي كندير ايله باغلانميش ييخيليبدير. قيزي چيخارديب باشماغي اونون آياغينا گئيديرديلر. گؤردولر كي، باشماق ائله بيل اونون آياغينا بيچيليبدير. آپارديلار پادشاهين اوغلونا. پادشاهين اوغلو بونو گؤرن كيمي جاني-ديلدن عاشيق اولدو و يئددي گون- يئددي گئجه توي ائيله­ييب، فاطماني اؤزونه آرواد آلدي. يئديلر، ايچديلر، يئره كئچديلر، سيز ده يئيين، ايچين، مورادينيزا يئتيشين!

About Author

saghi

See author's posts