بایاتی

ده نیزده گمین اوللام
سازدا دیل غمین اوللام
کؤنلونه کیم یارا وورسا
اؤزوم مرهمین اوللام
***
باغلاری بارسیز گؤردوم
هئیواسیز نارسیز گؤردوم
بیر اوزگور تاپانمادیم
مین دانا عارسیز گؤردوم
***
گؤیدن اندی آی اوزه
گؤزو دیدی آی اوزه
اوتانیب اینجه لندی
چیخانمادی آی اوزه
***
گوز یاشین سیله سیله
اوره کدن گوله گوله
سحر قوجاق آچیری
قیزیل گوللر بولبوله
***
داماریمدا قانیم سن
جاندان عزیز جانیم سن
بیر گون ایمانه گلسه م
دینیم سن ایمانیم سن
***
دیل آچماسین گیلئی لر
گیلئی لر کیمه نئیلر
خوشلوق سرخوشلوق اولسون
سوزولسون جاما مئی لر
***
ماوی گؤلده یار اوزنده
سو اوزنده نار اوزنده
خییال قوشو اوچوب گئده ر
یوخ اوره یین وار اوزنده
***
سؤز وار کؤنولو آلار
سؤز وار عقربدی دالار
دیـلـیـنـی ساخلاماسان
ایلان تک خالقی چالار
***
سؤز وار کؤنولو اوولار
سؤز وار شیطانی توولار
سؤز وار ساواش یاتیردار
سؤز وار قیلینجلار سوولار

About Author

saghi

See author's posts