تاج الملوک

بو نوع بیتگی یئتمیش گونه دیر. هامیسی نئچه ایللیک و سویوقا داواملی دیرلار.
تاج الملوک گولو معمولاً ایکی ایللیک اَکیله ر . بو گولون ویژه لیگیندن بودور کی : بئش یارپاق گولو واردیر و هر بیری بیر مَهمیزه باغلیدیر. مَهمیزلر بعضی نوعلاردا اوزوندور و بعضی نوعلاردا گوده دیر. یارپاق کاسالاری و گول کاسالاری مومکوندور بیر رنگده ، یا هره سی آیری رنگده اولسون. بوته سی نین دورومو طوقه لی و کوُل دور . یارپاقلاری شبدر بیتگیسی نین یارپاقلارینا بنزه ییر. بو نوع گولون آلچاق بوی و اوجا بوی نوعلاری واردیر کی دسته گول اوچون ساتیشا وئریلیر.
آییق اولون کی ، بو گولون بعضی نوعلاری سمّلی دیر. آنجاق بو گولو بئجه رتمه ک یئری اوشاق الی چاتان یئرده اولماسا یاخشیدیر.
بو گولون مسموم ائدن نیشانه لریندن: اوره ک بولانما و قوسماق، باش گیجه للنمه ک ، بدنده تیتره مه ک و سویوق احساس ائتمه ک، گؤرمه کده آخساقلیق یارانماق.
اگر گؤرسه ز بو گولون اثریندن بیر نفر مسموم اولوبدور ، ناخوش ائوینه یئتیرینجه قوسماقا وادار ائدین!
گول وئرمه ک:
بو گول اکیلندن سونرا ، یازدان ایکی آی گئدن چاغدان گلن ایل یایین اورتا آیینا دک ، گول وئریر. بو بیتگی ، گول وئرمه ک اوچون ، گره کدیر سویوق گؤرسون.
ایسته کلری:
بو نوع بیتگی آغاج کؤلگه سینده داوام ائدیر و گره کدیر چوخ گونه وه ر یئرلرده اکیلمه سین. بو گولون یئری آزجا گونشلی اولسا کیفایتدیر.
بو بیتگی ، شئهلی تورپاق و کئشه لن تورپاق ایسته ر .
فصل قورتولاندا ، سارالان یارپاقلار تورپاغین اوزوندن گؤتورولسون. بو گؤزه ل بیتگی ده یارپاغین توملوغو و ایستی نین آز اولماسی ، گول آچماقدا تأثیرلی دیر. هر نه قده ر یارپاق چوخ اولسا آز ایستی یه نیاز واردیر. اگر بیتگی چوخ کیچیک اولسا ، حتی سویوق گؤردورسه ک ده گوللری کیچیک و ضعیف اولاجاقدیر.
بیتگی گره کدیر اون ایکی دن اون بئش قده ره دک یارپاق یاراتسین تا گول باشلاماق مرحله سینه چاتسین.
چوخالتماق یولو:
بو بیتگی نین چوخالتماق یولو ، توخوم و کوللاماق یولو ایله مومکوندور و لاپ ساده یولو کوللاماق ( دیبدن آییرماق ) دیر و بو ایش پاییزدا و یازدا اولا بیله ر . آمما چون دیبدن آییرماق چوخ ایش آپاریر صرفه لی دئییل ، اونا گؤره توخوم سه پمه گی صلاح گؤرورلر.
توخوم سَپمه ک یولو بئله دیر:
یازین اوّلینده آزاد هاوادا خزانه ده توخومو اون بئش سانت آراسی اولان خط لرده اکه رلر ، سونرا بیر دؤنه یازین سونوندا ، بیتنلری باشقا بیر خزانه ده شیتیل ائده رلر، سونرا پاییزدا یا گلن ایل باهاردا اصل یئره کئچه رلر و بئله لیکله بیتگی یاز چاغیندا گوله گئده ر .
گره کدیر بو بیتگی نین توخومونا اکمه میشدن قاباق سویوق وئریلسین.
تازا گؤتورولن توخوملار تئز چیتلایار آمما کؤهنه توخوملارین سویوق گؤرمه گه نیازلاری واردیر.
بئله لیکله : توخوملاری شئهلی « پیت » ده ، اون آلتی درجه ایستی ده ، ییرمی دؤرد ساعات قرار وئره رلر ، ایسلانسین. سونرا اوچ هفته ، دؤرد درجه ایستی ده قرار وئره رلر. سونرا درجه نی اون سگگیزه قالخیزیرلار تا چیتلاماغی آسانلاشسین. کؤهنه توخوملارا مومکوندور سورتمه ک نیاز اولسون ، سورتمه کدن سونرا سونرا سویوق گؤرسون.
تاج الملوک گولو ، یاشیل فضانین گؤزه ل بیتگی لریندندیر. بو گول دن چمن ایچینده کی طرحلرده ایشلتمه ک یاخشیدیر. گول فرشلری نین بوجاقلاریندا یا تک بیر یئرلرده و گؤزه ووران اوجا یئرلرده ، بزه ک اوچون ، بو بیتگی دن یاخشی صورتده فایدالانماق اولار.
بعضی ویلالارین قاباغیندا اوجا کرت لرده یا باغچا قیراقلاریندا و بؤیوک گولدانلاردا یاشیل فضانین داهادا گؤزه للنمه سینه آرتیرماق اوچون بو بیتگی دن اکمه ک داهادا لازیم گؤرونور.

About Author

saghi

See author's posts