دوعـا

دوعا ائتمه ک آدامین اوره گین بوشالدیب روحون یونگول له ده ر .
معمولاً بیزلر دوعا ائدنده اللریمیزی گؤیه ساری دوتوب، تک بیر تانرینی خطاب ائدیب سؤزوموزو اونا دییه ریک.
آنجاق اینسان ، یامان گونلرینده اؤزونه یاردیم ایسته ر ، و دونیادا لاپ گوجلو یاردیم عالمی یارادان تک بیر آلله دیر.
آمما دوعانین نئجه لیگی ده ، دوعانین قبول اولماغینا بؤیوک سبب دیر. خلوت ده کؤنول ، تانری یا چاتماق ایسته ییر و اینسان سئویر اؤز اوره ک سؤزلرین بیر کیمسه ایله آرادا قویسون کی داها اوندان باشقاسی و گوجلوسو اولماسین. بئله بیر دویغو عرفان عالمینده یاخشی بیر حالدیر. مثال اوچون: دئییلیر « ای منیم تانریم! سنی آند وئریره م اؤز بؤیوکلوگونه منی عقله گلمییه ن قضا و قده ر دن اوزاق ائت و بالالاریمی بیردن بیره اوز وئره ن بلالردن ساخلا!»
معلومدور کی بعضی ایشله ر ، یالنیز تک تانری نین الیله اولا بیله ر و قضا و قده ر اوچون ال اوزالدماق ، هئچ بیر بشرین گوجونده ده ییل.
آنجاق بعضی آیدین دوعالار مختص تانری اوچوندور و باشقا آداملارا گؤز تیکمه ک تانری دان اوزاقلاشماق معناسیندادیر.
آمما بعضی موشگوللرین حل اولماغیندا تانری نین اؤزونون غیبی ایمدادی وارسادا ، یاراتدیقی بشرین الیله ده یاردیملیقلار اوز وئریر.
مثال اوچون اگر بیری تانری ایله خلوت ائدیب اونا دییه کی « ای تانریم من یالنیز سندن پول ایسته ییرم و سنین الینه گؤز تیکمیشه م » ، بو غلط بیر دوعادیر.
بو جومله نی اگر بئله معنا ائتسه ک کی یعنی « دوز یولدا حلال چؤره ک ایسته ییرم » یاخشیدیر ، یوخسا تنبل لیک اساسیندا و مغرورلوق اوزره اولسا تانری نین خوشونا گله ن بیر دوعا ده ییل.
بحارالانواردا بئله یازیلیبدیر: بیر شخص امام زین العابدین (ع) حضرتلری نین یانیندا عرض ائتدی: « الهی! منی یاراتدیقلاری نین هئچ بیرینه مؤحتاج ائتمه گیلن! ».
امام (ع) بویوردو : هئچ واخت بئله بیر دوعا ائتمه گیلن، چون بیر کس تاپا بیلمه ز سن کی باشقا بیر کیمسه یه مؤحتاج اولماسین.
هامی نین بیر بیرینه نیازی واردیر.
بلکه هر واخت دوعا ائدنده بئله بویور: « ای تانری! منی بدزات و پیس آداملارا مؤحتاج ائتمه گیلن! ».
هئچ واخت عارف بیر آدام خلق ایچینده دولانیب خلق دن قاچماق ایسته مه ز و بئلنچی آداملارین دوعاسی ، خلق دن قیرماق معناسی وئرمه ز .
بو بیر جومله یه باخین:
« ای تانریم! منی یاخشی آدملارین قارشیندا اوجالت و پیس آداملارین قارشیندا سیندیرما ».
تانری نه آدام سیندیراندیر و نه تکجه آدامی اوجالتماق اوچون ال آماندادیر.
نئجه کی بیر آدام یاخشی آد قازانماق اوچون یاخشی آداملارین یاردیملیغینا نیازی واردیر ، ائله پیس آداملاریندا بیر یاخشی آدامین آدی باتماق اوچون تأثیری چوخدور.
پس بو دوعانین معناسیندان معلومدور کی تانری اؤزو بعضی ایشله ر اوچون اؤز یاراتدیقلاریندان فایدالانیر.
تانری بیری نین دوعاسی نین اثرینده باشقاسینا، صالح بدنده لری نین الیله یاردیملیق ائدیر.
آنجاق تانری بیزی یارادیب ، بیر بیریمیزین الیمیزدن دوتاق و یولوموزدا پیس یاخشینی آییرماقلا آییقلیق اوچون اوندان یاردیم آلاق و ایشلریمیزده اونو یاددان چیخارتمایاق.
پس نه یاخشی کی امام زین العابدین (ع) حضرتلری بویوران دوعانی بیرده اوره کدن دییه ک:
« ای تانری! منی بدزات و پیس آداملارا مؤحتاج ائتمه گیلن! ».

About Author

saghi

See author's posts