دیلنچی

چؤل ده قالان بیر وحشی و ییرتیجی عرب ، مدینه شهرینه گئتدی و یولونا داوام وئریب ، دوز مسجدین ایچینه گیردی مگر تانری پیغمبریندن پول آلسین.
ائله بیر واختدا ایچه ری گیردی کی پیغمبر و اونون یاردیملاری اوردایدی.
اؤز ایسته یین دئدی و پیغمبردن دیله نچی لیک ائتدی. پیغمبر(ص) اونا بیر زاد وئردی ، آمما او قانع اولماییب اونو آز سایدی.
اوندان علاوه بیر آز یئکه و پیس دانیشیب ، تانری پیغمبرینه جسارت ائتدی.
پیغمبرین یاردیملاری ناراحت اولوب هیرسله ندیلر و آز قالمیشدی کی او کیشی یه آزار یئتیرسینلر ، آمما پیغمبر حضرتلری بو ایشین قاباغین آلدی.
پیغمبر(ص) سونرا او کیشینی اؤزوئیله ائوه آپاریب و بیر آزدا اونا یاردیملیق ائتدی.
عرب کیشی گؤردو پیغمبرین وضعی باشقا حؤکمرانلار و باشچی لار سایاقی بزه کلی دئییل و اوردا قیزیل سیککه ییغیلماییبدیر ، کیشی اوره کدن راضی چیلیق ائدیب و تشککور ائتدی.
بو واخت ، پیغمبر (ص) اونا بویوردو:
« سن دونن یئکه دانیشیب و قولای سؤزلر آغزینا گتیردین و منیم دؤربریمی ده اینجیکلی سالدین ، من قورخورام اونلار ( یاردیملاریم ) سنه آزار یئتیره لر، آمما ایندی منیم حضورومدا مندن تشککور ائتدین، آیا اولار بو تشککور کلیمه سین منیم یاردیملاریمین ایچینده ده یئنی دن ایشله ده سن تـا اونلارین هیرسلری یاتسین؟!»
دئدی: هئچ مانعی یوخدور.
او بیریسی گونو ، عرب کیشی مسجده گیردی ، بیر حالدا کی هامی بیر یئره ییغیشمیشدی، پیغمبر آداملارا ساری باخیب بویوردو: « بو کیشی دئییر بیزدن راضی دیر ، بئله دیر؟ » او کیشی دئدی « بئله دیر » و همان دالدادا دئدیگی تشککور کلیمه سین یئنی دن آغزینا گتیردی، پیغمبر و اونون یاردیملاری گولدولر.
بو زامان، پیغمبر، اورداکی آداملارا بویوردو: « من ایله بئلنچی آداملارین مَثَلی، همان او کیشی نین مَثلی دیــر کی ده وه سی چیخیب قاچمیشدی، آداملار ده وه یییه سینه یاردیملیق ائتمه یئرینه قیشقیردیلار و ده وه نین دالیجا قاچدیلار.
او ده وه بیر آزدا یئیینه ییب قاچماغینا گوج وئردی. ده وه یییه سی آداملارا ساری قیشقیریب دئدی: ایسته ییرم هئچ کیمین منیم ده وه میله ایشی اولماسین، من اؤزوم یاخشی بیلیرم ده وه می نئجه یوموشالدیب ساخلایام. آداملارین قاباغین آلدیقدان سونرا، گئدیب بیر سیخما اوت گؤتوردو ، هئچ قیشقیرمامیش و های کؤیسوز ، یاواشجا ده وه نین قاباغینا چیخدی .
اوتو ده وه یه گؤرسه درک قیرتی قیرتی ایره لی گلدی. سونرا آسانلیقلا ده وه نین ایپین الینه آلیب ، یولا دوشدو.
اگر دونن من سیزی آزاد قویسایدیم حتماً بو بدبخت عرب کیشی ، سیزین اَلیزیله اؤله ردی و پیس وضعده ( کوفر و بُت پرستلیک ایله دؤیوشمه کیمی ) اونو اؤلدوره ردیز.
آمما سیزین آرایا قاریشماغیزین قاباغین آلدیم، و اؤزوم یوموشاقلیق ایله اونو یاواشیتدیم.

About Author

saghi

See author's posts