سون باهارین ایلک گونلری یوخ، بیر قارانلیق گئجه سیدی! رحمتلیک آتام ساواکی‌لارین قورخوسوندان اؤز ایچینده گیزله نیردی! اونون بو دورومو آنالیغیمی مندن چوخ سینسیدیردی. آخی او حاقلیدی. گؤیده آللاه یئرده آرخادورانی یالنیز حیات یولداشی ایدی. من بیر اوشاق اولسایدیم دا، اونلارین او قورخولو دوروملاری، منی ده گؤزه گؤرونمز قارانلیق دونیالارا آپاریردی. گاهدان دا « اؤز ایچیمده خلوتله نیب دئییردیم گؤره سن من وارام، دونیا واردی.؟، اولمایا هر شئی بیر خیال کیمی دیر ائله منده خیالام »! بوجور سورغولار منی ده چوخ کیریخدیر میشدیر. گؤزلریمیزده بولود لار یووا قورموشدو گونلریمیز بیر- بیریندن قورخولو کئچیردی.!
آتام هر سحرآلاقارانلیقدا بیرنئچه نایلون کیسه دولوسو آغ کاغیذلارا یازیلمیش یاشیل دوشونجه لرینی بیر تلیسه ییغیب ائویمیزین قانشاریندا یئرله‌شن « کاغ دره سی » داغینا آپاریب گئجه یاریسی دا ائویمیزه گتیریردی.! بو ایشلر منی چوخ سورغو- سوآلا چکیردی. بیرگون آنامدان سوروشدوم. سیزه نه اولوب نییه قاریشمیسیز؟ نه دن اؤترو بو قده ر قورخورسوز.؟ آتام نییه هر گون تئزدن کار کاغیذینی تلیسه ییغیب آپاریر گئجه یاریسی دا گتیریر ائوه. ؟ بوایشین نه دَلیلینی منه ده دئیین!…
آنام دئدی: قورخوروق ساواکیلار گلیب سنی باسقینجا قویسونلار سن ده نه اولدوغونو اونلارا دییه سن!… آتان توتوقلانیب زیندانلاردا جزالانسین.! اونا گؤره سنه دئمه ییریک. دئدیم: آنا قورخمایین دوزدور کی، من بیر اون یاشیندا اوشاغام آمما ساواکیلار منی اؤلدورسه لرده اونلارا سؤز وئرمه رم!
آتام بیر گئجه بیزی دؤوره سینه ییغیب گون پروبلِئم لرینه گؤره دانیشیب دئدی: بوگونلر مملکتده ایستیبداد حاکیم دیر! ساواکی لار فیکیر صاحابلارین توتوب شیکنجه آلتیندا سؤز آلیرلار! اؤلن‌لر اؤلور اؤلمه ین‌لر زیندانلاردا چورویورلر!… آخی آتام حاقلی ایدی « ایلان ووران آلا چاتی دان قورخار » اونا گؤره کی، ایکی دؤنه سیاسی جورمونه توتوقلانیب آغیر زیندانا محکوم اولموشدور. ایلک دؤنه اوچ ایل، ایکینجی دؤنه آلتی آی زیندان چکمیشدیر. او گئجه آتامدان سوروشدوم. او تلیسده آپاریب گتیردییین نه دیر؟ منه ده دئ. آرخایین اول کیمسه یه دئمه‌رم.آتام بیر نئچه آن دانیشمادان دئدی: اوغول عومور بویو گؤردویوم حاقسیزلیقلارا، دویدوغوم قارانلیقلارا، ها بئله چکدیییم آغریلارا قارشی یازدیغیم شئعیرلریم‌دیر. اونلاری ائلیم اوبام، اولوسومدان خاطیر یازمیشام. او شعرلر وارلیغیم دیرلار. قورخورام ساواکیلار گلیب ائویمیزی آختاریب تاپسینلار یازدیقلاریمی آپاریب اؤزوموده زیندانلاردا چوروتسونلر!… «آنام آتامین سؤزونون آراسینا گیریب دئدی: کیشی دای بیز یورولموشوق، بو گئجه بو شئعرلری بیر یئرده گیز له دیب راحات اولمالیییق.» آتام دئدی: هاردا گیزله دک تاپیلماسین؟ قار یاغیش چورودوب آرادان آپارماسین! آنام دئدی: هر یئرده گیزله دیرسن گیزلت، بیزی بو قارا، قورخودان قورتار!… چوخ دانیشدیقدان سونرا آتام اوره‌یینین قانیلا بئجرتدییی اودلو شئعیر لرینی، اورکدن راضیلاشمادان بیر نئچه قات نایلونا بورویوب ایکی دمیر نؤیود چلله یینه قویوب آغزینی باغلادی.
ساعات گئجه یاریسیندان سوووشموشدو. اوچوموز بیرگه گئدیب حیه‌‌‌‌طیمیزین دالینداکی زمی یئریمیزده بیر قارا، یئرلی داشین دیبینده قازماغی باشلادیق. یئر برک اولدوغونا گؤره چوخ چتین قازیلیردی! آتام قان تر ایچینده کولونگ ایله یئری قازیردی من آناملا بیرگه قازیلمیش توپراقلاری یالین اللریمیزله ائشییه آتیردیق. خوروز بانینا آزالمیشکن دمیر چللک‌لری قازدیغیمیز یئرده باسدیریب ائوه قاییداندا آتام قهرله‌نیب دئدی:شئعیرلریم دولوسو چللک‌لری باسدیراندا ائله بیلدیم بیر عزیزیمی باسدیریرام بیزده آتاما باخیب سس سیزجه سینه آغلادیق.
آتام سؤزو داواملاییب دئدی: اوغول دونیانین قویروغو اوزون دور.!… من اؤلسم ده، ایسته رم اثرلریم قالسینلار. قویلادیغیمیز بو شعرلر اؤلمز اثرلریم دیرلر.
بو دوروم بئله ده قالماز دییشیلر!… اوندا،! شئعیرلریمی چیخاریب بیر ته هه ر چاپا یئتیره ر سیز.
دایانمادان دئدیم: اینشاللاه زامان یئتیره ر شئعیرلریزی اؤزوز چیخاریب چاپا وئریب یاییملایارسیز.
بوسؤزلردن سونرا ائوه قاییتدیق. آتام ائله بیل اؤز دوشونجه‌سینین آیناسیندا ایگیرمی مین بیت قویلادیغیمیز شعرلرین زامان سوره سینده چورودویونو گؤرموشدور.
دلی سئللر قاباغیندا داغ کیمی دایانان «بارز» ائوه گیرجه یین اوغلو اؤلموش بیر آنا کیمی! یانا – یانا آغلایب دئدی: شعرلریمی اؤز الیمله محو ائله دیم…
***
پاییز گونلری قونوم قونشو اوشاقلاریلا بیرگه او یئرده، چیلینگ آغاج اوینایاردیق.
همیشه گؤزوم او، «گؤوده سیز شئعر قبیرینه » دوشنده قهر بوغازیمی کسردی! یولداشلاریم بیلمه سین دئیه اؤزومو ساخلاردیم.! بویون پاییز گونودور! قونشولاریمیزدان خبر یوخ! بوتون ائولر اوچولوب تؤکولوب، بیزیم دامداشیمیز دا یئتیم اوشاق کیمی گلیب گئده نین آیاقلارینا باخیر!… من، اوشاقلیغین ایتیرمیش بیریسی، چیلینگ آغاج اوینامادان گؤزلریم شئعیر مزاریندا گؤیرمیش بیر قبیره دوشدو! باشداشیندا یازیلمیش دیر «اوستاد عباس بارز » شکیلینی گؤرنده ائله بیلدیم آتام شئعر اوخویور
بارز من وورغونام اؤز سئوگیلیمه
اصیل فرهنگیمه، آنا دیلیمه
آلاندا بیر دوستون الین الیمه
سانکی بیر میللتین الین سیخیرام …
About Author
پست های مرتبط
عرفانی دویغو
بایاتی
ادب ساحه سینده