یئکه سوموکلی و اوجا بوُی بیر کیشی ، کی دوروشوقی ورزیده و اوزو ایشیقلی ایدیر ، و دؤیوش مئیدانلاریندان صوراتلاریندا ایز قالمیشدیر و گؤزونون قیراغیندا قیلینج یئری بیلینیردی ، مؤحکم و آغیر آددیملاریله کوفه بازاریندان کئچیردی. بیر یاندادا بیر بازارچی دوکانیندا اوتورموشدور. او دؤربری گولدورمکدن اؤترو بیر سیخما زیبیل ، کیشی یه تولازلادی.
یول گئدن کیشی قاش قاباق ساللامادی و هئچ نه دئمه ییبن آغیردان قدملرین آتیب یولونا داوام وئردی . اوزاقلاشاندان سونرا بازارچی نین یولداشلاریندان بیری اونا دئدی: هئچ تانیدین کی او یول گئده ن کیشی کی اونا توخونوب دولاشدین ، کیم ایدیر؟!
-یوخ، تانیمادیم! گونده مین لر نفر بوردان کئچیر اودا بیری! مگر او کیشی کیم ایدیر؟!
-عجب!! پس تانیمادین؟ او کیشی تانینمیش فرمان وئره ن سپهسالار، مالک اشتر نخعی دیر .
-عجب! او کیشی مالک اشتر ایدیر؟ همان کیشی کی اونون قورخوسوندان اصلانلار
تیتره ر دی و آدی دوشمانلارین جانینا زلزله سالاردی؟
-بلی، مالک اؤزو ئیدیر.
-وای اولسون منیم حالیما! بو نه ایش ایدیر گؤردوم! ایندیجه امر ائده ر کی منی اینجیتسینلر. ایندی دالیجا قاچیب ، اَته گیندن یاپیشیب یالوارارام ، دییه رم منی باغیشلاسین.
مالک اشترین دالیجا دوشدو ، گؤردو مسجده ساری دؤندو . اونون دالیجا مسجده گئتدی ، گؤردو نامازا دوروبدور . یئتیشیب اؤزون تانیتدیریب دئدی من همان آدامام کی سیزه حؤرمتسیزلیک ائتدیم.
مالک: آمما تانرییه آند اولسون من مسجده گلمه میشم ، مگر بونا گؤره کی سنی دوعا ائده م. چون بیلدیم چوخ جاهل و یولدان چیخمیشسان ، هئچ یئره آداملاری اینجیدیرسن! آنجاق اوره گیم سنه یاندی، گلدیم تانری دان سنین یولا گلمه گیوی ایسته ییم.
-یوخ، منیم اوجور کی سیز گمان ائدیر سیز، قصدیم یوخ ایدیر.
About Author
پست های مرتبط
عرفانی دویغو
بایاتی
ادب ساحه سینده