هر باغدان بیر چیچه ک

باهـار شیروانی

شیروانلی باهار ۱۸۳۵-نجی میلادی ایلده شاماخی دا تاجیر عائله‌‌سینده دوغولموشدور.
اوشاقلیقدان درین ذکا و قابیلیتی ایله دقتی جلب ائدن باهار شاماخی مدرسه‌سینده تحصیل آلمیش، عرب، فارس دیللرینیدن باشقا، حساب، نجوم، شریعت علملرینی اؤيرنمیشدیر.
آتاسی وفات ائتدیگیندن عائله‌‌نی دولاندیرماق اوچون بیر مدت تجارتله مشغول اولموش، لاکین بو ایشدن تئز اوزاقلاشمیشدیر.
او، ایرانا گلیب آلتی ایل شیراز، ري، خراساندا ياشادیقدان سونرا شاماخی-يا قايیتمیشدیر. لاکین شاعر شاماخی دا قالا بیلمه‌میشدیر.
هندستانا سياحته گئتمیش، اورادان ایرانا دؤنه‌رک، تهران، خراسان، اصفهان و باشقا يئرلری گزمیشدیر.
او، تبریزه گلمیش و عؤمرونون آخیرینا قدر بورادا ياشامیشدیر.
شاعر ۱۸۸۳-جو ایلده تبریزده ذونیاسینی دییمیش و مشهور سرخاب قبریستانلیغیندا دفن اولونموشدور.
بدیعی يارادیجیلیغا واختی-واختندا باشلايان باهار شیروانی اثرلرینی
کلاسیک عنعنه‌‌لره اويغون اولاراق، اساساً، آذربایجان و فارس دیللرینده يازمیشدیر. لاکین اونون زنگین ارثی‌نین آز بیر حیصه سی الده‌دیر. بو رادا وئریلن نمونه‌لر
سید عظیم شیروانی‌نین “تذکیره”سیندن (اثرلری، اوچ جیلد، باکی، ۱۹۷۴)و “پوئتیک مجلیس لر”’ (باکی، ۱۹۸۷) کیتابیندان کؤچورولموشدور.
یئری گلمیشکن دئمه لییم ، شیروانلی باهارین فارس دیلینده یازدیغی بیر چوخ شعرلرینی میر جلال ذکی دوغما آنا دیلیمیزه چئویرمیشدیــر.
سنسیــز
هر کیم کی هجريار ایله دوشسه دماغیدن،
هئچ آچیلارمی کؤنلو اونون سئيری-باغیدن؟!
سوردوم سوراغینی دئدیلر غئیره یار اولوب
ای کاش لال اولایدی دیلیم بو سوراغیدن
سالدی مئي ایچره يوخسا لبی عکس ساقی‌نین
کیم، بیر اياغ ایله منی سالدی اياغیدن.
اؤلمکدن اؤزگه يوخ منه عشقینده بیر خيال،
پروانه يانماغین سئور آنجاق چیراغیدن.
بیر لاله يوزلو يار چکیب داغ سینه‌مه،
يا رب، سن ائتمه سینه می خالی بو داغیدن!
يئتدیکده گول دوداغینا مئي، بیلمزم آلیر،
مئيدن دوداق نئشه نی، يا مئي دوداغیدن؟!
سنسیز اگر باهار اولا (يوز) ایسته‌مز باهار
نه لاله داغیدن چیخا، نه غنچه باغیدن.
محشر آیتی
يئتمز تمامه زولف سياهین حکايتی،
بیر قیصه‌دیر اوزون، یوخ اونون بیر نهايتی.
آخیردا ائتدی خالینیدا قان ایچن لبین،
يولداشلیغین، بلی، اولور آخیر سیرايتی.
اؤيله کی، تار زولفون اونا هر زامان دَ‌يیر،
آخیردا اینجینیب، اوزون ائيلر شیکايتی.
دئردین کی، کیم علاج ائدر زخم سینه وه،
غمزن ائدر علاج، اگر اولسا عنايتی.
قددین حدیثی عالم آرا سالدی فتنه‌لر،
شوریش دوشر يئتنده، بلی، محشر آيتی.
تاپمازدی لبلرینده کؤنول چشمه‌ی-حیات،
خزرخطین گر ائيله‌مه‌يه ایدی هدايتی.
دئرلر کی، هیجر غايتی هیجراندیر، باهار،
يارب، هارا يئته، گؤره‌سن، هیجر غايتی؟
سهمانلایان: بهروز ایمانی

About Author

saghi

See author's posts