یوکا

آزاراق ائو آدامی تاپیلار کی بو بیتگی نین آدی و شکیلی ایله تانیش اولماسین. یارپاقلاری بؤیوک ، اوزون و خنجر تکی اوجو بیز و یاشیل رنگینده دیر.
قولونون اوجون قیرتساق ایکی و اوچ قولا بؤلونوب حاچا آتاجاقدیر.
بو بیتگی نین سویا چوخ آز نیازی واردیر . گول وئره ن قولو هر ایکی اوچ ایلدن بیر گوله دولور. گوللری چوخ و بیر یئرده زینقرویا اوخشار آشاغی باخیر و آغ و کرمی رنگینده دیر.
یوکا گولونون کافی ایشیقا نیازی واردیر آمما گونون اورتاسیندا شاخان گونش ، مخصوصاً شوشه دالیسینداکی ایستی گوندن خوشو گلمه ز . بئش هفته یه دک کؤلگه یه دؤزه بیله ر .
قیش دا اون تا اون بئش درجه ایستی لازیمدیر و یایدا ائشیکده و بالکون لاردا و یا باغچا قیراغیندا قالا بیله ر .
یای دا هفته ده بیر دؤنه و قیش دا هر اون گوندن بیر دؤنه سو وئرمه ک ایسته ر .
کود اوچون چوخ حریص دئییل آمما یازدا و یای دا سولو کوددان هر اوچ هفته دن بیر دیبینه تؤکمه ک یوکانی گوجلندیره ر .
یوکا گولو اوچون یاخشی تورپاق، « لیمونی » و یا گوجلو و یوموشاق باغچا تورپاغی دیر.
دؤرد ایل اولده هر ایل گره کدیر گولدانی ده ییشیلسین، آمما سونرا هر اوچ ایلدن بیر گولدانی ده ییشیلیب، یئکه گولدانا گئچیریله ر . گولدانی ده ییشنده گؤزله یین کی تورپاغی برکیمیش اولسون و تؤکولمه سین.
یارپاقلارین تمیزله مه ک اوچون یوموشاق و ایسلاق پارچادان فایدالانین و هئچواخت ایشیلدادان موادلاردان ایشلتمه یین!
دیبدن بئچه له یَن قوللارین آییریب اکمه کله یوکانی چوخالتماق اولار و بیرده معمول دیر کی قوم دا پیل ووروب کؤتوکلندیریب گولدانا گئچه رله ر .
اگر قیش دا گؤرسه ز یوکانین یارپاقلاری قورویان کیمی اولور بیلین کی ایستی دن دیر و گولدانی سه رین یئره آپارین.
اگر گؤرسه ز یوکانین آلت یارپاقلاری ساری رنگه چالیر، بیلین کی ایشیق آز یئتیشیر و نورلو یئره آپارمالی سیز!
اگر گؤرسه ز تازا یارپاقلار آز و آغیر یئکه لیرلر، بیلین کی کود ایسته ییر.
اگر گؤرسه ز یارپاغین اوستو کپه ک ووروب ، بیلین کی قارچ ناخوشلوغو واردیر ، اوندا سم ووروب و دوزه لینجه سو توزو سه پمه کدن اوزاق اولون.
اگر گؤرسه ز قولون بوتون یارپاقلاری دیبیندن قارالیب چوروریور، بیلین کی سو چوخ وئریلیبدیر و گره کدیر هر ایکی سووارماغین آراسیندا گولدانین تورپاغی قوروسون.

About Author

saghi

See author's posts