خاطیره لی بایاتی

آنا قدرینی بیلمه ییریک! آنجاق آنا بیز تورک لر آراسیندا چوخ عزیزدیر و مقدس! آنادان دؤنن آدامی آدام! بیلمه میشیک. آنجاق من ده آنامدان چوخ اؤیره نمیشم. گاهدان هئچ بیر سؤز دئمه میش، ولی دونیا قده ر منه ائتکی بوراخیب، منی یولا چکیبدیر.
بیرینجی ایل مکتبه گئدیردیم. تبریزده گلزار مدرسه سینه. من قونشوموز ناصر ایله هر گون باهم گئدیب و بیرگه ده گلردیک. ائولریمیز ده بیر کوچه ده، قاپیلاریمیزدا اوز اوزه ایدی. مدرسه دن گلنده، چوخ گونلر ناصرین آناسی قاپی چرچوواسیندا دایانیب ناصری گؤزله ییردی. هردن بیر منیم آنام دا قاپیدا دایانیب شمسی خانیم – ناصرین آناسییلا دانیشاردیلار. اونلار بلکه ده نئچه دقیقه لر بیرگه دایانیب صحبته مشغول اولاردیلار.
امتحانلار قورتولوب، کارنامه لریمیزی آلمیشدیق. ائوه چاتدیقدا آناملا شمسی خانیم یئنه قاپیدا دایانیب بیزی گؤزله ییردیلر. شمسی خانیم یازی – اوخویا بیلردی. ملی حکومت زامانی بیر ایل آنا دیلینده درس اوخوموش و یازیب – اوخوماغی یاخشی بیلردی. بیر ایل اونا ۶ ایللیکجه درس اؤیره تمیشدی. آما منیم آنام اوخوماق بیلمزدی؛ یانی ساوادی یوخودو؛ آنجاق دوشونمک نئجه؟ کارنامه لریمیزی شمسی خانیم آلدی و اوخویوب – توتوشدوردو. ناصرین قبول اولماسینی گؤروب سئویندی و اوزوندن اؤپدو. منیم آنام کارنامه نی اوخویانمادی. ناصرین آناسی اوخویوب دئدی: رضا دا قبول اولوب، آما ناصرین معدلی رضادان آرتیقدی!
آنامین رنگی آتدی! اوزونه گتیرمه دی، آنجاق اوره ییندن نه کئچیردی؟ – اونون اوغلو قبول اولوبسا دا، اؤزگه نین اوشاغیندان اسگیک نمره گتیرمیشدی. آنامین رنگی نین آتماسی منه ائله اثر ائتدی کی، کارنامه می شمسی خانیمدان قاپیب نئجه ایچه ری گئتدیگیمی بیلمه دیم. گیزلی بیر بوجاغا قاچیب آغلاماغا باشلادیم. آخی نییه من آنامین قیزاریب – بوزارماسینا سبب اولدوم؟ آنامین گوناهی نه دیر کی اؤزگه لر یانیندا اوشاغینا گؤره بوزارسین و خجالت چکسین؟ نییه من آنامین باشینی یئره تیکدیم؟ منیم آنامین گوناهی نه دیر؟ بونلاری دوشوندویوم لر بو ایدی. آنجاق تصمیمی ده توتدوم!
درس ایلی سونا چاتدی. امتحانلاری وئردیک. کارنامه نی آلماق اوچون مدرسه یه گئتمک گره ک ایدی. اؤزو ده آنا و یا آتا ایله گره کیر. من ایلن ناصر، هر ایکیمیز آنالاریمیز دا یانیمیزدا بیرگه مدرسه یه طرف یولا دوشدوک. شمسی خانیم بلکه ده سینه سینی قاباغا وئریب و ناصرین مندن چوخ نمره گتیردیگی فیکیرده دیک یول گئدیردی. مدرسه یه چاتدیق. مدرسه آلچاقدایدی. نئچه پیلله آشاغی گئتمه لی ایدیک. ایکی پیلله ائنمیشدیک کی گؤزوموز بیر کاغاذا ده یدی. کاغاذ اوسته منیم آدیمی یئکه یازیب و شاگرد اوّل اولدوغومو بیلدیریردی. من اوز به اوزوموزده یاپیشدیریلان بو کاغاذی اوخویوب آناما گؤسترمکدن قالاق، هله پیلله لر اوستونده معلمیمیز آقای احمدی قارشیمیزا چیخدی. منی گؤردوکده الیمی الینه آلدی و بارک الله دئییب، باشیمدان اؤپدو. اوزونو آناما چئویریب دئدی: خانیم باغبان، بو سیزین اوغلونوز بیزیم باشیمیزی اوجالدیب. مدرسه نین بیرینجی شاگردی اولوب. اونا بتر بیر جایزه ده وئره جه ییک.
آناما باخدیم. زحمت لریم هئچه گئتمه میشدی. گؤزلری ایشیقلانیردی، ائله محبتله منه باخدی کی بلکه ده بیرینجی دفعه بیلدیم کی آنام منی قوجاقلادی. بو قوجاقلاما هئچ زامان یاددیمدان چیخماییب. بوگون ده ائله بیر قوجاغی دیله ییرم. آنجاق منیم ده گؤزلرین یاشاردی. ایچیمده آغلاییردیم. آنجاق بو دؤنه آنامین خوشحاللیغینا آغلاییردیم. بو آنی یادا سالدیقدا، بیر بایاتی همیشه اوره ییمه گلر:

About Author

saghi

See author's posts