شفلورا

همیشه یاشیل گوللردندیر.
یئکه لمه گی آرامدیر. تک قول و مرکب یارپاقلاری واردیر.
یومورتا یا مستطیل شکیلینده بئش یارپاقدان دوزه لمیش ، آچیق یاشیل رنگینده پنجه لری واردیر کی بیر نقطه دن چیخیرلار.
شفلورانین ایکی نوعو واردیر : یاشیل و آلا بولا . بعضی نوعلاریندا مرکب یارپاقلاری نین تک سایی لاری یئددی و اون یا اون ایکی یارپاقادا چاتیر.
بو گؤزه ل بیتگینی چوخلو یارپاقلاری نین گؤزه للیگی اوچون ساخلارلار و چوخ ائولرده پنجره قاباغیندا یا میز اوستونده بزه ک وئره نلردن دیر.
بو گولون چوخالتماقی چوخ راحاتدیر. یایین اولینده قوللاری نین باشیندان سگگیز یا اون ایکی سانت بویوندا ایتی پیچاق ایله که سیب پیل ووروب کؤتوکلندیره رلر.
سونرا گولدانا کئچیب بؤیوده رلر.
شفلورا اوچون لاپ یاخشی تورپاق بئله دیر:
بیر اؤلچو باغچا تورپاغی ، بیر اؤلچو یارپاق تورپاغی ، بیر اؤلچو چوروموش پئهئن.
بو گول اوچون متوسّط ایستی اون اوچ درجه دیر. متوسط و آز ایشیغا نیازی واردیر.
شفلورا گره کدیر دوز گونش آلتیندا قالمایا یوخسا یارپاقلاری یانیب قارالار.
گولدان تورپاغی قورودوقجا گولدانی سو ایله دولدورون ، آمما تورپاغی زیغ قالماسین. یعنی گره کدیر گولدان تورپاغی آرتیق سویو ائشیگه چیخارتسین .
آییق اولون کی شفلورانین گولدانیندا سو چوخ قالسا و کئشه لمه سه اونون کؤتوگونون چورومه گینه سبب اولار.
بو گولون یارپاقلاری نین اوستونه هردن بیر سو توزو سه پمه ک یارپاقلارین پاکلانماغینا و گؤزه للیگینه آرتیرار، آمما بو ایش اوچون یالخی سودان فایدالانیب هئچ واخت ایشیلدادان موادلاردان ایشلتمه یین .
هر ایکی هفته دن بیر سولو کود وئرمه ک بو گولون شادابلیغی و قول قاناد آچماغی اوچون یاخشیدیر.
بعضی واختلار بو گول دن شوشه گولدانلاردا بزه ک اوچون فایدالانارلار.
و آیری گوللریله بیرگه یئکه گولدانلاردا اکمه کله گؤزه للیک یارادارلار.
چون بو گول چوخ اوجالیب یئکه لنده اوسته گئتمه ک اوچون یا اؤزون ساخلاماق اوچون دایاق ایسته ر یاخشیدیر قوللاری نین ساغ قالماغی اوچون بیر دایاقا دایاندیریلسین.

About Author

saghi

See author's posts