عارفانه

حلقه اولدوق قاپیسیندا یئنه مئیخانه لرین
بو حالیله یئتیشه ک وصلینه پئیمانه لرین
بیزخراباتا اوشاق واختی گلیب دؤشمه میشیک
کرپیچ اولدوق دیواریندا بو قدیم خانه لرین
دیلیمین خنجری عاشیقلری دوغرار گوندوز
گئجه شمعیم یاخاجاق آتشه پروانه لرین
مشورتله آچیلیر سیرّی اگر دونیامیزین
من دئییم سنده چئویر تسبئحینین دانه لرین
ایسته ریک تئز قورتارا صوحبتینی ایندی قلم
واقیف اوللوق حالینا سونرادا دیوانه لرین
خواب غفلت آلاجاق آلسا بیزی آغوشا
بیرجه آندا دؤشه ریک قوینونا افسانه لرین
او گؤزه للر ائله هوپموشدو بیزیم جانیمیزا
صائب اولدوق مایاسی بیزده بو بتخانه لرین

About Author

saghi

See author's posts