عارفانه

وفاسیـز

بهار عمر خزان اولدو یاغدی باشیما قار بو گون گول اوزلری سئومگ اولوب منیم چون عار منه دئیرلر قوجالدین جوانلیق ائتمه ، ولی او زاد کیم اولدو طبیعی نئجه زوال تاپار؟ من ائیلرم بو محبت اودون اورکده خموش اگر حرارتی زایل ائده اوزوندن نار محبت اهلی ملام و مذمته باخماز بو سؤزلره قولاق آسماز اگر […]

بهار عمر خزان اولدو یاغدی باشیما قار
بو گون گول اوزلری سئومگ اولوب منیم چون عار
منه دئیرلر قوجالدین جوانلیق ائتمه ، ولی
او زاد کیم اولدو طبیعی نئجه زوال تاپار؟
من ائیلرم بو محبت اودون اورکده خموش
اگر حرارتی زایل ائده اوزوندن نار
محبت اهلی ملام و مذمته باخماز
بو سؤزلره قولاق آسماز اگر حقیقتی وار!!
من اول کسم کی هوی(ا) و هوسله مشهورم
او سرخوشم کی آدیم عشق ایله اولوبدور جار
یاپیشدیرار ایکی بیگانه نی علاقه عشق
بیرین بیرینه نئجه ایکی تخته نی مسمار
اگر گوزللری سئومک منیم گوناهیمدیر
بو بیر گوناهدیر کی اوندان من ائتمم استغفار
صبا پیامیمی جانانیمه یئتیر دئی کی ای
سوزی یالان، اوزی نامهربان وفاسیز یار
سنه گوره گوتوروب مندن ال قوهوم ، اقوام
سنین یولوندا شماتت ائدر منه اغیار
اگر سن ایسترن ای مغچه(مغبچه) شیخ صنعان تک
بویور سالیم قوجالیق چاغی بوینوما زنار
بویون بلاسین آلیم ، دور آیاغه مقدمیوه
نثار قیلماقا یوخ باش و جان اوچون میقدار
قادان آلیم گل اوتور دوریوه گزیم دولانیم
نئجه گزر دولانار دور مرکزه پرگار
سنه اثر ائله مز ای عجب منیم آهیم
من آغلایاندا گلیر نالیه در و دیوار
هارا بو خلقین الیندن گئدیم اولوم راحت؟
گورون منیم چین اولوب بو گئن دونیا دار
آدام کی ایستمز اولسون اوز اختیار ایله ن
بو هرزه خلقی گؤرور اولماقا اولور ناچار