آشیق باهارعلی دن بیر احوالات

گؤنلرین بیرینده قاپی چالینیب ،آچیلاندان سونرا معلوم اولوب کی بزازدی ،گلیب کی بیر آز بورج حسابیندان آلسین. مجبورا اونی یولا سالیب باشلاییب آرواددان سوروشماقا کی بو نه بورجودور؟
آرواددا دئییب کی: یادیندادی بئش آلتی گون بوندان قاباق آنامیله قارداشیم گلمیشدیلر؟
آشیق جواب وئریب کی: بلی، بو ایشین اونا نه ربطی واردیر؟
آرواد دئییب کی: واردیر نئجه یوخدور! اوگؤنو قارداشیم منه پای گئتیرمیشدیر، اونا گؤره ده من بو بزازدان بیر چادیرالیق آلمیشام تا گئدنده ده ده م ائوینه بایراملاشماغا،سنین طرفیندن آناما پای وئرم.
آشیق ناچارلیغیندان دئییب: آل آپار گؤره ک!
بو ایش، آشیغین احوالاتین پوزوب، اونو فیکره سالیب. ائله بونا دوشونورکن، سینه سی جوشا گلیب،گؤروب بو دردی سازا دئمه سه اولمایاجاقدیر. سازی آلیب سینه سینه بئله دئدی:

ائولره سالیرسان تالان،
گلنده نوروز بایرامی!
اوشاقا ساتیرام یالان،
گلنده نوروز بایرامی!
***
دئدیم آرواد بو نه هایدی،
دئدی دوستان گلن پایدی،
دئدیم کاش قیچی سینایدی،
گلنده نوروز بایرامی!
***
نیسیه نی بول کسدیریر،
بزازلارا قول کسدیریر،
اسلحه سیز یول کسدیریر،
گلنده نوروز بایرامی!
***
نوروز گلسه گوللر آچیر،
بوشلولارین رنگی قاچیر،
باشا بیر بؤیوک درد آچیر،
گلنده نوروز بایرامی!
***
بختی آغدی بنزیر قارا،
قولاق وئر آشیق باهارا،
بیلمیرم باخ قاچیم هارا
گلنده نوروز بایرامی!

About Author

saghi

See author's posts