دردیمی درمانه یئتیر

ای فلک درد و غمیم شرحینی جانانه یئتیر
ثبت قیل ملک خراجینی او سولطانه یئتیر
داهی یوخ تاب و توان جسم ضعیفیمده منیم
یاکی آل جانیمی یا دردیمی درمانه یئتیر
روح پروردی لبی وقت تبسمده صبا
روحی بو تندن آلیب او لب خندانه یئتیر
گؤردو او زلفی کؤنول اولدو پریشان احوال
بو پریشانلیغی او زلف پریشانه یئتر
زلف رویون ائله دی مذهبیمی سست منیم
یا منی کافیر ائله یا دا کی ایمانه یئتیر
گئتدی او یوسف مه روی گؤزوم آغلاما آز
خون آب جگرین جهد ائله عمانه یئتیر
بونجا حیران حزین سالما آیاقدان اؤزونی
گلشن جاندا بیتن سرو خرامانه یئتیر

About Author

saghi

See author's posts