سنسیزلیک

آرخانا باخمادان چکیب گئدیرسن
دؤنگه سنی دؤنور، سن ده دؤنگه نی
بیر منم دالینجا باخان بیـرده من
دؤنگه دؤنگه ،من ده، ایتیررم سنی
***
خییـاوان خییـاوان سانسور اولورام
بیر قیز اوره‌گیمه فیرتینا سالیر
بیردلی یارادیر، منده کی درام
بیر قیز قاچاقچی دان سییانور آلیر
***
شَکلین تئلفونومون ائکرانچاسیندا
اود وورور گؤزومه، باخ ، سرین سرین
بئینیمین گون دوغان، بوش تئراسیندا
پاپالان اویناییر، خاطیره لرین
***
حایات نه یه یارار، سنسیزلیگیمده؟
سئودان ذرّه ذرّه منی، یاخاجاق
ویترین‌لر اؤنوندن، هر کئچدیگیمده
ایکس لارج گئییم‌لر، منه باخاجاق
***
مـن سنی اؤزومه، تانری بیلردیم
دئمک تانری‌لاردا آتارمیش، قولون
کؤنلومو گئتدیگین یول‌لارا سردیم
گئت هارا گئتسن، آچیق اولسون یولون
***
مومیالی جَسَده دای ، بنزه‌یه‌جم
تاریخه کئچه‌جم، گونون بیرینده
باخیب یول‌لارینا شئعیر دئیه‌جم
سسیم قوجالاجاق تئل سیم‌لرینده
***
دالینجا آغلاییب چاغلامیرام هئچ
بوتون موتلولوق‌لار گئت سنین اولسون
قیل کؤرپودن نه‌ایسه بیرآز یاواش کئچ
قوی باری سئوگیمیز جننته قالسین

About Author