ایلمَک ماهنیسی
آذربایجانین باشا باشیندا، اؤزللیکله محتشم تبریز شهرینده عائلهلرین دولانیشیغی فرش توخوماقدان چیخاردی. ایلمک سالانلار دا بو صنعتین مظلوم اعضالاری ساییلاردیلار کی زور ایله، فرش اربابلارینین ظولمو آلتیندا جان و دل ایله چالیشیردیلار. گاهدان اوشاقلارین آتالاری، یوخسوللوق اثرینده، اوشاقلارین فرش اربابلارینا، معین زمان قارشیلیغیندا ساتاردیلار. بو شعرلری، ائلیمیزین قهرمان اوغلو مناف فلکی تبریزلی و اونون معلیمی عباسعلی رضایینین ۵۰ ایل بوندان اؤنجه آدینه مهدآزادی درگیسینین یئددینجی نمرهسینده یازدیغی مقالهدن، خلاصه اولاراق، تورکو لشدیریب، خدمتیزه چاتدیردیم.
کرخانادا ایشلهرم
میخانادا خشلهرم
پالتارلاریم ییرتیلسا
دؤرهسین کیریشلهرم
***
ایلمک ساللام پول آللام
اربابین قیزین آللام
ارباب قیزین وئرمهسه
ایلمگی ترسه ساللام
***
ایلمک ایلمک قوش ایلمک
قانادی گوموش ایلمک
من دالییا قالاندا
یئگین، یئگین دوش ایلمک
ایلمک سالانلارین آنالاری هر زمان اؤز اوشاقلارین بیر دیل ایله کرخانایا یوللاردیلار، ایلمک سالانلارین آنالاری بئله اوخویاردیلار:
علی بالا دور ایاغا
گون دوشدو یورقانیوا
اوستان گلیب دالینجا
شوی گتیریب بویونجا
آپاراجاق اؤزایله آنا
شوی ویراجاق دویونجا
او زامان مظلوم اوشاقلار آنالارینین جوابیندا بئله اوخویاردیلار:
ای وای آنا کرخا
باغریمیقان ائیلهدی
ایلمک سالان بارماغیم
گؤر نه قابار ائیلهدی
(تایلاری قان ائیلهدی)
آنا سؤیله ییر:
اولسون اوغول گئت یئنه
آخشاماجان سوت یئنه
(آخشامیوی گود یئنه)
آخشام ائوه گلنده
بیرشاهیوی وئر پیه
بارماغیوا سورت یئنه
ایلمک سالانلار ایشدن یورولوب، جمعه گونونو و جمعه آخشامینی و هفته اوچون آرزیلاردیلار.
چونکی هفته اوچو(دوشنبهلر) و جمعه آخشامیلار، فرش کرخانالاری، ناهارا قده ر ایشلردیلر.
جمعه گونلری بوتونلوکله تعطیل اولاردی.
شاببادان، شوببادان
جمعه باخیر قوببادان
فرش قورتولان زامان کی ۳ لای دان ۱۰ لایا دک قالیرمیش، بئله اوخویارمیشلار:
فرشی سالدیق لهوره
الله موبارک ائلهسین
اوستایا خبر ائلهیین
شاگردانانی حاضیر ائلهسین
فرشی قورتاریب کسندن سونرا، فرشی سککیه سالیب بئله اوخویاردیلار:
فرشی سالدیق سککییه
اوستا گئدیر مککهیه
اوستا بیزه بیر شاهی وئر
بیزده چیخاق سککییه
حمید احمدزاده (تیلیمخانلی)
پست های مرتبط
عرفانی دویغو
بایاتی
ادب ساحه سینده