یارین فراقی

فراقــــــــــه چاتسا الیم ریشه سینی یاندیراجام
چالیب داش اوستونه هیجرانی پارچالاندیراجام
***
نگارین آیریلیقیندان گؤزوم یاشی یاغاجاق
سینــــم دنیز کیمی غیضیله دالغالاندیراجام
***
دا بسدی تؤکمه فلک باده غصّـــــه بارداقیما
کی داشسا صبریم اونو من هارا جالاندیراجام
***
او آهو گؤزلوم اگر باوری یوخ ایستکیمه
سالیب کمند غمـــه دردیمی ایناندیراجام
***
خیالی قاش قارالان چاق بیزه قوناق گله جک
ساییب آجیلاریمی خاطرین اوتاندیراجـــــام
***
گلین چیخاندا گولوم گوز یاشیم حنا یئرینه
اورک قانیلا قاتیب اللرین بویاندیراجــــام
***
گئدنده غــــربته محملده نازیله لیلیم
قطار هجرتینی آغلاییب دایاندیراجام
***
اونون ساغ اولماقینا یئدّی دفــــــــعه نیّتیلن
بو خوار اولان جانیمی باشینه دولاندیراجام
***
گئجه یاریسی هیجردن گئنه اورک سیخیلیر
او قدری ناله چکیب ناصحی اویاندیراجــام
***
یوخومدو غم منی یارین فراقی اؤلدوره جک
غــمیم بودور او زامان یاری غصّه لاندیراجام

About Author

saghi

See author's posts