وقف قيلديم جانيمى بير عمر جانانيم سنه
جان عزيزدير جاندان آرتيق يوخدو قوربانيم سنه
غم چكيب دردينله يانديم يانمادين سن درديمه
اولمادى مشهود هرگز قلب سوزانيم سنه
داغ يورولدو تيشه ی سَعييم يورولماق بيلمه دى
اولمادى مفهوم هئچ تيشه مده طوفانيم سنه
هانسى پيسليك منده گؤردون، موجب قهرين نه دير؟
نئيله ميشديم ياخشيلقدان غيرى من جانيم سنه
چون دوزه دوز اگرىيه اگرى پيسه پيسدير دئديم
اينجيدين خوش گلمه دى اقرار ميزانيم سنه
من سنين دردينله يانديم يانمادين سن درديمه
خلق آراسيندا مثالدير يان منه يانيم سنه
درد وار درمانى يوخدور درد وار درمانى وار
نا اوميدم قالسا گر انجام درمانيم سنه
ايندى جولان وور سواريم، قوو، آياقلا، از منى
آچديغيم ميدان سنيندير كندى ميدانيم سنه
اى وفاسيز آيريليق بيلمزدين اصلاً سن نه دير
آيريليق درسين يقين اؤيرتدى شيطانيم سنه
ايچ بولانديرماقدا بس واضحدى شيطان نيّتى
فهم قيل عقلينله تفسيريندى برهانيم سنه
ياده گلديكجه اونو قووما، عزيز توت خاطرين
شكوه بختيمدن گتيرميش روح مهمانيم سنه
بوينوزوم بؤركومده هئچ اوز هئچ ده آستار دلمه ميش
ضامنيمدير قوولوما سوگند قورآنيم سنه
موجب تكدير خاطر اولسا شعريم عفو قيل
بير مزاحم دوشدو گؤزدن اشك غلطانيم سنه
سن ده اى قبريم داها بير آيرى سوقات ايسته مه
بس دگيلمى گه تديگيم قلبيم دولو قانيم سنه؟
حاصل عؤمرون نشانى قالدى سندن عاقبت
مين داغ اوستن داغلانان بير قلب گريانيم سنه.
About Author
پست های مرتبط
تصاویر دیده نشده از شهید آلهاشم
کاریکاتور روز/ کنترل تخلفات ساختمانی در تبریز به کمک پهپاد
کاریکاتور روز/ گنبد آهنین صهیونیسم یا سوماخ بالان