یوخسول – وارلی

رسول اکرم(ص) همیشه کی کیمی اؤز مجلسینده اَیله شمیشدی، یاردیملاری اونو اوزوک قاشی تکی دؤربرین آلیب آرایا سالمیشدیلار.
بو حالدا اسکی پالتار گئیمیش بیر یوخسول قاپیدان گیردی و ( اسلامی سنتیله کی هرکیم بیر مجلسه گیردی هر مقام دا اولسادا ، و هئچ بونا باخمایاراق کی فیلان یئر منیم یئریم دئییل، هر یئرده بوش یئر گؤردو اوتورسون ) دؤربره باخیب بیر یاندا بوش یئر گؤروب تئز گئدیب اوردا اَگله شدی. قضادان اونون یانیندا کی چوخ وارلی کارلی آدام ایدی. وارلی کیشی تئز پالتارلاری نین اَته گین ییغیشدیردی و اؤزون او یوخسول و اسکی پالتارلی کیشی دن آرالادی.
پیغمبر اکرم(ص) گؤز آلتی بو ایشه باخیردی ، آنجاق اوزون او کیشیه دؤنده ریب بویوردو:
قورخدون اونون یوخسوللوغوندان بیر زاد سنه یاپیشسین؟!
-یوخ یا رسول الله(ص)!
-قورخدون سنین واریندان اونا سرایت ائله سین؟!
-یوخ یا رسول الله(ص)!
-قورخدون پالتارلارین بولانا؟!
-یوخ یا رسول الله(ص)!
-پس نه اوچون اؤزونو ییغیشدیریب قیراغا چَکدین؟!
-بوینوما آلیرام کی کیریخدیم ، خطا ائله دیم .
ایندی بو خطانی جبران ائدیب گوناهیمین کفّاره سی اوچون، حاضیرم واریمین یاریسین بو مسلمان قارداشیما باغیشلایام.
-یوخسول: آمما من بئله بیر زادی ایسته میره م
-آداملار: نییه ؟
-چون قورخورام من ده بیر گون هاوالانام و بیر مسلمان قارداش ایله او جور گئدیش ائده م کی بو گون بو کیشی من ایله ائله دی.

About Author

saghi

See author's posts