یوموشاقلیق

ایکی قونشو – کی بیری مسلمان و او بیریسی نصرانی ایدیر، گاهدان بیر بیرلریله اسلام باره سینده دانیشیردیلار. مسلمان چوخ عابدلیک ائده رمیش ، آنجاق مسلمانچیلیقدان او قده ر تعریف ائتدی کی نصرانی اسلام دینینه اوز گتیردی.
گئجه یئتیشدی ، سحره یاخین تازه مسلمان اولان نصرانی ، گؤردو قاپیسین دؤیورلر. حئیرتله نیب و ناگران حالدا سوروشدو: کیمسن؟
قاپی دالیندان سس گلدی: «من فیلان کسم» و اؤزون تانیتدیردی . همان قونشوسو – مسلمان قارداش ایدیر کی اونون الیله اسلام دینینه اوز گتیرمیشدیر.
– گئجه نین بو چاغی نه ایشین واردیـــر؟!
– تئز دستماز آل و پالتاریوی گئی ، ناماز قیلماق اوچون مسجده گئده ک .
تازه مسلمان ، عؤمرونده ایلک دؤنه اولاراق ، دستماز آلدی و اونیله بیرگه مسجده ساری یولا دوشدو.
هله گئجه دن قالیردی. او قده ر ناماز قیلدیلار کی سحر آچیلدی و هاوا بیر آز ایشیقلاندی. صوبح نامازین قیلدیلار و دوعا ائتمه گه باشلامیشدیلار کی هاوا بوتونلوکله ایشیقلاندی.
تازه مسلمان، ایسته دی ائوینه گئتسین ، یولداشی دئدی: هارا؟!
– ایسته ییرم ائویمه قاییدام ، صوبحون واجیب نامازین قیلدیم داها قورتولدو.
– بیر آزدا دؤز نامازین دالیسینا ( تعقیبینه ) داوام وئر ، گون چیخسین.
– چوخ یاخشی.
تازه مسلمان مسجدده، او قده ر دوعا و ذکر دئدی کی آنجاق گون چیخدی. دوردو گئتسین ، مسلمان یولداشی ألینه بیر قرآن وئردی و دئدی: هله بیر آزدا قرآن اوخو قوی گونش اوسته قالخسین. و من تاپیشیریرام کی بو گونو اوروج اولاسان ، بیلمه ییرسن کی اوروج دوتماغین نه ثوابی واردیر!
یاواش یاواش ناهارا یاخینلاشدی . دئدی: دؤزگیله ناهارا چوخ قالمادی ، ناهار نامازین مسجدده قیلگیله، ناهار نامازی قیلیندی ، یئنه دئدی: دؤزگیله! چوخ چکمه ز ایندی فضیلتلی آخشام نامازی نین واختی یئته ر ، اونودا واختیندا قیلاق فضیلتیندن فایدالاناق. آخشام نامازین قیلاندان سونرا دئدی: گوندن چوخ واخت قالماییر داها، آنجاق اونو شام نامازینا ساخلادی. شام نامازیندان سونرا ایسته دی دوروب گئتسین ائوده افطارین یئسین، مسلمان یولداشی دئدی: بیر نامازدان چوخ قالماییر داها ، اودا عشاء نامازی دیر. بیر ساعات دؤز واختی چاتسین، اونودا قیلیب، فضیلتیندن فایدالاناق سونرا آرخایین ائوه گئده ک.
کیشی دؤزدو عشاء نامازین قیلدیلار ، سونرا یولا دوشوب ائوه گئتدیلر.
ایکینجی گئجه ، سحره یاخین گئنه قاپی دؤیولدی. سوروشدو : کیمدیر؟
– من سنین قونشونام . تئز دستماز آل و پالتاریوی گئی بیرلیکده مسجده گئده ک!
– من کئچه ن گئجه- کی مسجددن قاییتدیم ، بو «دین» دن استعفا وئردیم . گئت بیر باشقا بئکار آدام تاپ کی ایشی اولماسین و بوتون واختلارین سنیله مسجدده کئچیرتسین. من عیال وار و یوخسول بیر آدامام ، ایش و چوره ک دالیجا دولانیرام.
امام صادق (ع) حضرتلری بو حیکایه نی اؤز یاردیملارینا تعریف ائتدیکده، بویوردو: بئله لیکله او چتین دوتان عابد، اؤزو ، بیر یازیغی اسلام دینینه ساری گتیردی ، سونرا اؤزوده اسلام دان ائشیگه سالدی.
آنجاق بو حقیقتی آلماق ایله آییق اولون کی آداملارا چتین دوتمایین. هر کسین دؤزومون ، گوجون و چَکیمین نظره آلین. ائله ایش گؤرون کی آداملار دین دن قاچماسینلار بلکه اونا یاخینلاشماق ایسته سینلر.
آیا بیلمه ییرسیز کی « اموی » لرین سیاست لری چتین دوتماق و چییرینتی سالماق دیر، آمما بیزیم یولوموز ، یوموشاقلیق، کئچینمه ک و ائل ایله یولا گئتمه کدیر .
بیز ایسته ییریک اوره کلری أله گتیره ک.

About Author

saghi

See author's posts