بایاتی

فلكين ايشي دوشسون
آغزيندان ديشي دوشسون
اونوندا منيم كيمي
نامرده ايشي دوشسون
***
فلكين قهري منه
گلمه ییر رحمي منه
دولدورور غم باده سين
ايچيردير زهري منه
***
سو گلير گيله ـ گيله
بولبوللر گلير ديله.
ياريمي باغدا گؤردوم،
باتيبدير قيزيل گوله.
***
سو گله ر آخار، دويماز،
داغ ـ داشي ياخار، دويماز.
گؤزلريم يار گؤزونه،
اؤلونجه باخار، دويماز
***
سو گله ر آخار گئده ر
وَریانی ییخار گئده ر
یار منیم کؤنلوم آلار
ألینده سیخار گئده ر
***
ائیله‌دئيمي سو يازدا،
آخار گئده‌ر سو يازدا.
من ياري گؤرمه‌ميشم،
كئچن يازدا، بو يازدا
***
عزيزيم كيمي گؤزلر
تار چالان كيمي گؤزلر
قاشین تکی قاش اولماز
گؤزلرين كيمي گؤزلر
***
بو داغدا مه‌لر گله ر
داغلاري أنه ر گله ر
نامرده توش اولانين
باشينه نه‌لـر گله ر؟
***
بو داغدا أكديم أكين
آلديـلار اليـمده كين
هئچ كافیر هئچ مسلمان
اولماسين منيم تكين
***
بير قوش گلير آغ داشدان
خبر وئـريـر قارداشدان
قارداش باجيدان دويسا
باجي دويماز قارداشدان
***
بو گـَلَن اؤزون بيلمه ز
دانیشسا سؤزون بيلمه ز
هر گَليب سو دولدوران
چشمه نين گؤزون بيلمه ز
***
بـوسـتـانـام تـاغـيـم آغلار
غـمـدن يـارپـاغـيـم آغلار
ساغـام اؤزوم آغلارام
اؤلــسه م تورپاغيم آغلار

About Author

saghi

See author's posts