شهید

آخدی قیزیل قانین اود یوردوموزا
وطـن بـاشـدان بـاشا لاله زار اولدو
سن ظفر قازاندین چون اوردوموزا
دوشمنلر داغیلدی تار و مار اولدو
***
سن باهار یاراتدین قیشین چاغیندا
قیزیل گوللر آچدی وطن باغیندا
داغ کیمی دایاندین سئل قاباغیندا
گئری یه قاییتماق سنه عار اولدو
***
سـنـی بـنـزه دیـرم شـیـره پـلنگه
هـاوادا قـارتـالا سـودا نـهـنـگـه
سـیـنـه سـپـر ائـتدین توپا تفنگه
گول بیتدی قانیندان نوبهار اولدو
***
او قده ر بؤیوکدور شهید مقامی
کی اونون وصفینی یازانماز هامی
شامی یم غیبدن آلدیم الهامی
هر سؤزوم بیر در شاهوار اولدو

About Author

saghi

See author's posts