سلمان

بیر گون امام علی(ع) حضرتلری ائویندن ائشیگه چیخدی و یولدا سلمان فارسی حضرتلرین گؤروب اونا بویوردو: ای سلمان: وضعیّتین نئجه دیر.
سلمان جوابیندا بئله عرض ائتدی: دؤرد زادین غمینده باش دولاندیریرام.
حضرت سوروشدو: او دؤرد غملی زاد نه دیر؟!
سلمان دئدی: اوّل خانیمیم و عائله م، کی مندن یئمه ک ایچمه ک و یاشاییش اوچون لازیم اولانلاری ایسته ییر.
ایکینجیسی بو کی: بؤیوک تانری اوچون گره کدیر دوزگون بنده اولام.
اوچونجوسو بو کی: شیطان هر آن ایسته ییر منی یولومدان جایدیرسین!
دؤردونجوسو بو کی: عزرائیل (ع) هر آن گودور منیم واختیم یئتیشسین جانیمی آلسین.
امام علی (ع) حضرتلری بویوردو: ای سلمان! سنه بهشتی موشتولوق وئریره م کی اوردا یاخشی بیر مرتبه یه ال تاپاجاقسان. منده بیر گون پیغمبر (ص) حضرتلری نین قوللوغونا گئتمیشدیم، او حضرت منه بئله بویوردو:
« یا علی! وضعیّتین نئجه دیر؟»
عرض ائتدیم: چتین وضعیتده دولانیرام ، و خانیمیم و ایکی اوغلوم حسن و حسین اوچون ناراحتم، چون سودان ساوای آیری بیر زاد ائومیزده یوخوموزدور.
اوندا حضرت بویوردو: یا علی! ائو موشگولون حلّ ائتمه ک یولوندا غم یئییب، آغری چکمه ک ، جهنّم اودوندان قورتولماغا سببدیر. و هر آن اؤلومو یادا سالماق ، گوناهلارین کفّاره سی اولاجاقدیر.
سونرا بئله بویوردو: یا علی! بؤیوک تانری، بنده لری نین ایسته کلرین و معاشین یارادیر و بو ساحه ده غم یئمه گین هئچ فایداسی یوخدور. آنجاق ( یاشاییش اله گتیرمه ک اوچون موشگوله دؤزوب چالیشماقلار ) مهربان تانری نین یانیندا ثواب یازیلیر

About Author

saghi

See author's posts