دوزلوک

دوزلوک ياغان ياغيشدي
دوم-دورو بير باخيشدي
دوزلوک دئديم گول آچدي
گول آچدي سونبول آچدي
دوزلوک شيرين دي بالدي
اوندان سورا نه قالدي‌ ؟
اولدوز دور او گئجه‌لر
يولچويا يول گؤستره‌ر
دوزلوک گوندي گونش دي
قارانليق لا گولش‌دي
يالان آمما تولكو‌ دو
ووردو يئره دوزلوغو
يوگوردو دالدان اونا
چوخ ووردو بوهتان اونا
اونو نفسدن سالدي
يالنيزجا اوزو قالدي
قاتدي اؤزون سؤزلره
پرده چكدي گؤزلره
آمما يوخ آنلامير او
حقيقتي قانمير او
دوزلوگو گيزلين قالسادا
گيزلين-گيزلين يانسادا
بير گون چيخاجاق اوزه
آيدين اولاجاق گؤزه
يالان ايتيب باتاجاق
دوزلوک ديري قالاجاق
دوزلوک دئديم گول آچدي
گول آچدي سونبول آچدي.

About Author

saghi

See author's posts