ساقی رندان

ووروب عشقین باشیما کؤنلوم اولوب قان بوگئجه
گلمه سن حالیم اولار زار و پریشان بو گئجه
اولمور آرام اوره گیم دالغالانیب دریـا تک
یئنه غملر ائله ییر سینه ده طوفان بو گئجه
منی مجنون ائدیب اول لیلی جمالیـــن حسنی
چکه جکدیر منی تا کوه و بیابان بو گئجه
خبرین یوخ گؤزه لیم من نه جفالــر چکیرم؟
قویماییر یـاده سالام وصلینی ، هیجران بو گئجه
او قارا تئللره اولموشدو گرفتـــار اوره گیم
داراییب تؤکدو یئره وئرمه دی امکان بوگئجه
مست و مدهوش دوشوب جومله خرابات اهلی
چونکی دلداریم اولوب ساقیِ رندان بو گئجه
دین و ایمان آپاریـر خال رخِ جانانیـم
زولفونه باغلی گئدیـر مین دلِ نالان بو گئجه
هر قدمده تؤکوره م دُرّ تکی گـــؤز یاشیمی
«صدر» ه مئهمان گله گر اوُل مه ِ تابان بو گئجه

About Author

saghi

See author's posts