عـوريان زار اولدوم يئنه،
مـجنونا باخ، مجنونا باخ!
سـلطان غار اولدوم يئنه
هـامونا باخ، هامونا باخ!
داش أوسته قويدوم باشيمي،
تـؤکـدوم عمانه ياشيمي.
تـوفان نـوح اولدوم يئنه
جيحونا باخ، جیِِحونا باخ!
وحـشی یاتـاغی مـنزلیم،
قوشلار یوواسی کاکـیلم!
افـعی ألـیمده اویـنارام،
افـسونا بـاخ، افـسونا باخ
سالدی منی دیلدن دیله
دوشدو ایشیم چوخ موشگوله.
ای مرغ جان! بو دیده ی
پـرخونا باخ، پرخونا باخ!
سالدیم اوجاغـا مصحفی،
ساز ائیله دیم چنگ و دفی.
بوینومدا بیر زونـاری گـؤر
ملــعونا بـاخ، مـلعونا باخ!
سولدو، خزان، اولدو گولوم،
دوشدو نوادان بولبـولوم.
بیردم منی شاد ائتــمه دی
گـردونا باخ، گـردونا باخ!
آلـدی ألیمدن یاریــمی،
آرتـیـردی آه و زاریـمی.
هـر ایلده بیر داغ آرتیرار
قـانونـا باخ، قـانونـا باخ!
کئچدیم فلکدن،کیمدیر او
دورسـون منیمله روبه رو؟
یوزمین خزینه م وار منیم
قـارونـا باخ، قــارونا باخ!
قـویما ألیندن تیشــه نی،
تؤک داغا بو انـدیشه نی.
فرهـاد شـیرین دیر گلن
گولگونا باخ، گولگونا باخ!
قــوربان وفــالی یارینا،
عاشیـق سئون دلـداریـنا.
وه!وه! عجب شبرنگ ایمیش
شبخونا باخ، شبخـونا باخ!
قندی نباتی تؤک دوزه،
گـل بیر تماشا قیل سؤزه
بیر گؤر نه گؤوهر دوزموشم
مضـمونا باخ، مضمونا باخ!
سـورما نـباتـی دن خـبر،
کیم بو کلامی کیم دئیه ر؟
دور بـیر نـظر اول قامـت
مـوزونا بـاخ، موزونا باخ
About Author
پست های مرتبط
ادای احترام سران قوا و مسئولان ارشد کشور به پیکر امام شهید
تصاویر دیده نشده از شهید آلهاشم
کاریکاتور روز/ کنترل تخلفات ساختمانی در تبریز به کمک پهپاد