تاق، تاق، تاق…
– كيمدير؟
تاق، تاق، تاق…
– آیدين، بالا گؤر كيمدير – آنا اوتاقدان چاغيردي.
آیدين ائیواندا، تزه‌جه قایيرديغي اوچورتماسينا, قویروق دوزلديردي. شيريق- شيريق کسديیي کاغيذلاري حالقالایارکن زنجير حالقالاری کيمي بير- بيرينه کئچيردی. آیدين اوچورتماسي‌‌نين قویروغونو زنجير‌لتمک ايسته‌یيردی. آیدين آناسي‌نين سسيني ائشيدرکن گئديب قاپيني آچدي، هئچ کيمي گؤرمه‌دي. تزه‌دن ائیوانا قایيتدي. اوتوروب- اوتورماميش تزه‌دن قاپيني دؤیدولر: تاق, تاق, تاق…
عصبي‌ليکله یئنه ده قاپي‌یا ساري گئتدي. بو دؤنه ده کيمسه‌ني گؤرمه‌دي. اؤز- اؤزونه بئله دوشوندو کي، بلکه بير دجل اوشاق اونو ساريیيب اينجيتمک ايسته‌یير. قاپيني آچيق قویدو، اگر اورا یاخينلاشان اولسا اونو گؤره بيلسين.
تاق- تاق- تاق…
بو دؤنه قاپيدان چوخ اوزاقلاشماميشدي و بيردهکي قاپی آچيق‌ايدي، آنجاق یئنه کيمسه گؤرونمه‌دي.
حئیرته دالاراق تعجّوبلو- تعجّوبلو حیطين اورتاسيندا دایانميشدي.آناسي اوتاقدان چاغيردي:
– قاپي دؤین کيمدير؟
آیدين باشيني قالديردي, آناسينا جاواب وئرسين كي، بيردن گؤزلري حیطين قيراغينداکي یاشلي بؤیوک آغاجا دوشدو. بیر قوش آغاجين گؤوده‌سينده اوتورموشدو و اوتوردوغو گؤودهیي سورعتله ديمديک‌له‌یيردي. تاق- تاق سسي چيخاريردي. آیدين اهمالجا قوشو آناسينا گؤستره‌رک دئدي:
– قاپيني دؤین باخ بو قوشدور.
آنا پنجره‌دن ائشيیه باخاراق گوله- گوله دئدي:
– بو قوشون آدي آغاج ده لن‌دير، دوزدور بو تاپدالایان آغاج ده لنميش.
– آناجان نه اوچون بو آغاج ده لن بئله بيزيم آغاجيميزي یارالایير- دئیه آیدين آناسيندان سوروشدو؟ من اينديجه گئديب اونو داشلا وورارام بلكه، بيزيم آغاجيميزي یارالاماسين.
– یوخ آیدين جان، بو ايشي گؤرمه, آغاج ده لن‌لر هئچ واخت آغاج‌لارا زیان یئتيرميرلر، بلکه اونلارين بو ايشي آغاج‌لار اوچون چوخ دا فایداسي واردير. آغاج ده لن‌لر برک و اوزون ديمديکلريايله آغاج‌لارين قابيق‌لاريني دئشيب اونلارين آلتيندا گيزله‌نن زیانکار قورد- قوش‌لاري یئيرلر. بئلهليكله اونلار آغاجلاري زیانكار قورد- قوشلارين زيانيندان قورتارارلار. من ايسه چوخ سئوينيرم کي، بو آغاج ده لن بيزيم ائوده‌کي آغاجي تاپيب و اونون ساغلامليغينا یارديم ائله‌یير.
آیدين دئدي: ايندي آنلاديم نه اوچون آغاج ده لن‌لر آغاجلاري تاق- تاق تاققيلداديرلار.
آنا دئدي: دئیه بيليرسن آغاج ده لن‌لر نه اوچون آغاجلاري دؤیورلر.
– آغاج ده لن‌لر قاپيني دؤیورلر كي، قورد- قوش‌لار ائشيگه چيخان کيمي اونلاري دوشوروب یئیه‌لر.
About Author
پست های مرتبط
عرفانی دویغو
بایاتی
ادب ساحه سینده