چوخلار اینجیکدی کی، سن اونلارا ناز ائیله میسن
من ده اینجیک کی، منیم نازیمی آز ائیله میسن
ائتمیسن نازی بو ویرانه کونولده سولطان
ائوین آباد اولا ، درویشه نیاز ائیله میسن
هر باخیشدا چالیبان کیپریگی مضراب کیمی
بیر قولاق وئر، بو سینیق قلبی نه ساز ائیله میسن؟
باشدان آچ یایلیغی ، افشان ائله سوسن – سونبول
سن بیزیم بایرامیمیزسان قیشی یاز ائیله میسن
سن گون اول، قوی غمیمیز داغدا قار اولسون، اریسین
منیم آنجاق ایشیمی سوز و گداز ائیله میسن
من بو معناده غزل یازمالی حالیم یوخودی
سن جوجوق تک قوجانی فرفره باز، ائیله میسن
کاکلی باشدا بوروب باغلامیسان تاج کیمی
او قیزیل ساچدان اونا ، گوللی قوتاز ائیله میسن
سینه بیر دشت مغان دیر ، قوزی یان – یانه یاتیب
منیم آغلار گوزومی ، اوردا آراز ائیله میسن
بو گوزللیک کی جهاندا سنه وئرمیش تانری
هر قده ر ناز ائله سن ائیله، کی آز ائیله میسن
منی بو سوز یله آتدین، آرالاندین بیلیرم
آرانی بیر پارا نامردیله ساز ائیله میسن
دستماز ائیله دیگین چشمه، مسیحا قانی دیر
بیلمیرم هانسی کلیساده نماز ائیله میسن؟
من عشیران اوخوسام، پنجه عراق اوسته گزه ر
گوزلیم، ترک اولالی ، ترک حجاز ائیله میسن
تازا شاعر، بو ده نیز هرنه باخیرسان دیبی یوخ
چوخ اوزاتسان بو غازی، اورده گی قاز ائیله میسن
بسکه زلف و خط و خالین قوپالاغین گوتدون
زلفعلی نین باشینی آز قالا داز ائیله میسن
گل ! منیم ایسته دیگیم کعبه ییخیلماز، اوجالار
باشدادا کژ گئده سن ، دیبده تراز ائیله میسن
خط و خالیندن آلیب مشقیمی قرآن یازارام
بو حقیقت له منی ، اهل مجاز ائیله میسن
منی، دان اولدوزی، سن یاخشی تانیرسان کی سحر
افقی خلوت ائدیب راز و نیاز ائیله میسن
About Author
پست های مرتبط
عرفانی دویغو
بایاتی
ادب ساحه سینده