بو بیتگی بوغدا طایفاسینداندیر و چوخ مواظبت ایسته ییر. آنجاق چمنین یاخشی قالماغی هزینه گؤتوره ندیر. چمنی اوندا اکین کی سو موشگولوز یوخدور و اونا هر گون یئتیشمه ک اوچون واخت واریزدیر. چونکی گره کدیر ، ایستی چاغلار دا چمنه هر گون سو وئریلسین.
چمن چوخلو عمومی پارک طراحلیقلاریندا ، باغلاردا ، ویلا لاردا و ورزش عرصه لرینده اکیلیر. چمن ایکی نوع دیر: بیر جوره سی سویوق یئرلردن اؤترودور و بیر جوره سی ایستی اؤلکه لرده اکیلمه ک اوچوندور.
ایستی یئرده اکیله ن چمن لرین ، اوتوز درجه دن اوسته اولان ایستی یه ده راحاتلیق ایله داواملاری واردیر.
سویوق اؤلکه لرین چمنی ، ایکی واختدا اکیله ر : بیر واختی یازین اول لری دیر و بیر واختی دا پاییزین اول لری دیر. آمما ایستی اؤلکه لرین چمنین ، چوخ ایستی یا چوخ سویوق چاغلاردان ساوای ، بوتون زامانلاردا اکمه ک اولار.
دئمه ک اولار چمن یاشیل فاضادا بیر اؤرتوک دیر کی یئرین توز تورپاغی نین قاباغین آلماقدا چوخ فایدالی اولا بیله ر و گؤزه ووران یئرلرده گؤزه للیک یاراتماق اوچون لازیم گؤرونور.
چمن لرین چوخ نوعلاری واردیر. آنجاق گره کدیر طرحی نظره آلیب و یئرینه باخاراق ، اؤز نوعون آلیب اکه ک.
چمنین نئجه اکمه ک یولو بئله دیر:
الف- یئرین آماده ائتمه ک: اگر او یئر کی ایسته ییریک اوردا چمن اکه ک آلچاق اوجا یا چالا چوخور اولسا ، اوّلده باشلاییب اورانی هامارلایاریق. چون هامارلاماساق ، سونرا چوخور یئرلرده سو یغیشیب باتلاق ائده ر و چمن بوغولار و اوجا یئرلرده ده سو چوخ دایانا بیلمه ز آنجاق آخیب گئده رسه تئز قورویوب آرادان گئده ر .
ب- بئلله مه ک : هامارلانان یئری بئلله ییب سونرا اوستوندن دیرمیق چکه ریک . بو ایشده یئرین ایری داشلارین و کسسه کلرین ییغیب ائشیگه آتاریق.
یئر چوخ بوش اولسا توخوم سه پمه کدن قاباق یئر برکیدن ایله یئری آزجا برکیده ریک.
ج- توخوم سه پمه ک : هر نوع چمنین سه پمه ک اؤلچوسو فرقلی دیر. معمولاً هر متر مربع یئره ، اوتوز گرم دن دوتدو تا یئتمیش گرمه دک سه پمه ک اولار. ( قالیبدیر هانسی نوع چمن دن اولا) . آییق اولون ، آلدیقیز توخوم خالیص و لازیم اولان سمّ لره بولانمیش اولسون.)
توخومو یئره سه په ن چاغی سئیره له نمیش یا ایری گؤز الک ایله ، اله نمیش پئهن اوردا آماده اولسون. چمن اوچون لاپ یاخشی پئهئن، مال پئهئنی نین چوروموشو دور.
توخومو یئره سه په ندن سونرا اوستونه ایکی یا اوچ سانت قالینلیغیندا پئهئن وئریب ، نارین سه په ن ایله سوواراریق.
توخوملار جوجه ریب چیخانا دک ، سو وئره نده گره کدیر کی آرامجا سویو یئره امدیره رک و یئری دوزگون ایسلاداق و چوخ زورلو سو وئرمه یه ک ، یوخسا توخومون یویولماغی نین قاباغین آلا بیلمه ریک.
چمن ایستی چاغلاردا گره کدیر هر گون سو ایچسین و چمنین سووارماق واختی نین لاپ فایدالی چاغی آخشام دیر.
***
چمن اوجالاندا هر دؤنه اوچ سانت اوجادان چمن ووران ایله آزالدارلار.
معمولاً یازدا و یای دا چمن وورماق هر آیدا ایکی یا اوچ دؤنه اولا بیله ر.
چمن هانسی یئرلرده یاخشی دیر؟
چمن چوخلو یاشیل فضالاردا و سو موشگولو اولمایان یئرلرده یاخشیدیر.
معمولاً گؤزه گلن یاشیل فضالاردا گول طرح لری اوچون یئرده چمن اؤرتوگو یاخشی بیر گؤزه للیک یارادار.
فصلی گول طرح لری قورو یئرده چوخ یاخشی گؤزه ل گؤرسه نمه ز ، آمما او ایشی چمن ایچینده ائتسه ک گؤزه للیگینه داها آرتیق چوخلار.
چمن، ورزش یئرلرینده یاخشیدیر.
***
چمن گره کدیر چوخ کؤلگه یئرده اولماسین و گونه وه ر یئرده یاخشی بوی آتار.
چمنه چوخ سو وئریلسه رنگی سارییا چالار.
اگر چمنه چوخ سو وئریلمه ییر آمما رنگی ساری یا چالیر بیلین کی تورپاغی نین « اذُوت » ی آزالیبدیر.
یا اوستونه سئیره کدن آغ کود ( آذوت ) سه پیب تئز سو وئرین یادا کی چمنین اوستونه سئیره کدن چوروموش پئهئن سه پین!
About Author
پست های مرتبط
عرفانی دویغو
بایاتی
ادب ساحه سینده