آغلادیــر منی

خزان اولموش گوللر. تالانمیش چؤللر
پوزولمیش ائللریم آغلادیر منی
داغلارین دالیندا. وطن یولوندا
سارالمیش گوللریم آغلادیر منی
***
نامردین ظولومی. مردین ئولومی
فلکین بؤلومی. ترسه دؤنومی
باغلادی قولومی. کسدی یولومی
گوناهسیز اللریم آغلادیر منی
***
داماردا غیرتیم. ایتگین حورمتیم
دوغری محبتیم. پاک صداقتیم
تالانمیش ثروتیم. یازیخ میلتیم
قورویان چوللریم آغلادیر منی
***
ظالیمین نعره سی. مظلومین سه سی
وطنین غصه سی. دردلی صحنه سی
یئتیمین ناله سی. غملی دیده سی
(اصغرم) غملریم آغلادیر منی

About Author

saghi

See author's posts