خاطیره لی بایاتی

ایش گؤرمه ناشی کیمی
آخما گؤز یاشی کیمی
برک ایشده کیشی دورار،
ده ییرمان داشی کیمی.
هر بایاتی مین اوره یین سؤزودور. مین انسان دویغوسونو دیله گتیریر، بیر بایاتی مین انسانین کؤنول یاراسی دیر، اوره ک دویونتاوسودور، مین انسانین تجروبه سی نین حاصیلی دیر، دیللرده یونتالانیر، هر کیمسه اونو بیر هاوایا سالیر، کلمه لرین ده ییشدیریر؛ اؤز اوره یینه یاتالن کیمی دوغرولدور و نهایتده بیر بایاتی کیمی هامی نین اوره یینه یاتان اولدوقدا قالیر و همیشه لیک دیللر ازبری اولور.
بو بایاتی نی دا من هر زمان ائشیدنده آتامیم دیلیندن ائشیتدیگیم اوچون ده بلکه، آتامین سؤزلری یادیما دوشور.
من کنکوردا قبول اولموشدوم و بیلیم یوردونا گئتمه لی ایدیم.
ایلک دؤنه اولاراق تک باشیما اوزاق سفره چیخمالی ایدیم. تبریزدن باشقا بیر شهره گئدیب و تک یاشامالی ایدیم. داها تک یاشاماغیم و اؤز اؤزومدن موغایات اولمالی ایدیم. یولداشلاریم دا منی یولا سالماغا گلمیشدیلر. آتام دا هله منی بوراخمامیشدی.
او دا منی یولا سالماغا یولداشلاریملا برابر ترمینالا گلمیشدی. ماشین یولا دوشوردو. هامی ایله بیر – بیر گؤروشدور و اؤپوشدوم. سوندا آتامین الینی اؤپوب اؤپوشندن سونرا اتوبوسا آددیم آتدیم. آنجاق آتام الیمدن یاپیشیب، بیر ده اوتوبوسدان آشاغی ائندیردی.
اوزونو منه توتوب بئله دئدی: اوغلوم، داها بوندان بئله اؤز آیاغین اوسته دایانمالیسان! داها من سنین یانیندا دئییلم. آنجاق سون نصیحتیمی ده ائشیت _البتده اوگونه قده ر ده یرلی نصیحت لرینی مندن اسیرگه میشدی و هله اوندان سونرا دا اسیرگه مه دی). جبیندن بیر اسکناس ۱۰۰ تومنلیک (او زمان ۱۰۰ تومنلیک اسکناس ان بؤیوک و ده یرلی پولوموز ایدی) چیخاریب دئدی: اوغول، بیر زمانلار وار کی بئله ۱۰۰ تومنی یئره آتیب باخمامالیسان، بیر زمان دا وار بیر قران (او زمان ان کیچیک پولوموز ایدی) دان اؤترو ال با یاخا اولوب حاققینی آلمالیسان. او بیر قیراندان کئچمه ییب، ولی ۱۰۰ تومندن کئچمه یین لازیمدیر.
هئچ ده اوره یین یانماسین.
بونو بیل کی او بیر قیراندان کئچسن سنه چوخ باها گلر! اوغلوم بونو دئدیم سن اؤزون بو مثالی یاشاییشینین بوتون صحنه لرینه یایمالیسان.
گاهدان یوز تومندن کئچیب، بیر قیراندان کئچمه مک!
بو سؤزون معناسینی اوگون یاخشی باشا دوشمه سم ده، حاققیندا دوشونوردوم. باشیما ایشلر گلدیکجه، او سؤزو آنلاییردیم.
بوگون گؤرورم نه دَیَرلی بیر سؤزوموش! بو بایاتینی دا اوخودو:
آدینی قویدون کیشی
بوراخ چکیش برکیشی؛
بوش یئرین بئلدارلاری
خوشلامازلار برک ایشی.
دوغرودان دا بوش کیشی لر برکه دوشنده بیلینر نه کاره دیرلر.

About Author

saghi

See author's posts