باخدیقجا قانیم قایناییردی. گؤزومو اوزوندن هئچ بیر آندا یاییندیرا بیلمیردیم. اودا ترپنمه‌دن دوز باشیمین اوستونده دایانمیشدی. بیر آزدان آستا- آستا آشاغییا ائندی. یئتیشدیک‌ده بوتونلوک‌له منی بورویوب، باشلادی فیرلانماغا. سرعتی چوخالدیق‌دا آیاق‌لاریم یئردن اوزولدو. هر یئری یالنیز جیزگی گؤروردوم، هر بویادا جیزگی. اؤزومو تاپشیرمیشدیم اونا، قورخوسوز. منی هارایا آپاراجاغینی بیلمیردیم. یانلیش یئرلره آپارماماغینا اینانیردیم آمما. نه قده ر زمان کئچدی بیلمه‌دیم. آستا- آستا سرعتینی آزالدیردی. یئنی‌دن هنده‌ور اؤز شکلینده گؤرسه‌نیردی. آیاق‌لاریم یئره دیدیک‌ده، گؤودمدن آیریلیب، گؤیه قالخدی. داها گؤرمه‌دیم اونو.
گؤی اوزو توند ماوی‌دیر. هر یئر پار- پار پاریلداییر. دییه بیلمیرم هارادیر!!! دنیز قیراغی‌دیر؟ اورمان‌دیر؟ باییردیر؟ داغ‌دیر؟ یوخسا …؟هامیسی بیرلیک‌ده خولیالاریمدا اولان یئرلره بنزه‌ییر.
هر گولدن وار، هر حیواندان دا، هر انسان‌دان دا. یالنیز منیم یئریم بوش‌ایدی ییغوالاریندا.
یقین یئر کوره‌سی‌دیر بورا. گؤره‌سن هامیسینین بورا گلمک‌لری منیم کیمی‌ایمیش، یوخسا…؟ گؤزومه چارپان اَن گؤزه ل باخیشلار و گولوش‌لر‌ایدی. حیس ائدیردیم گؤزلریم‌له، دوداق‌لاریم گولوشه دولور. قاش قاباغیم آچیلیردی. داها قئیقاجی باخیش‌لارلا، قاش- قاباق گؤرمه‌یه‌جه‌ییمه اینانیردیم.
سئویندیییمدن بیلمیردیم هارا گئدیم، نئیله‌ییم. داها بوندان بئله، بو گولوش‌لرله قادا- بالانین اسکیک اولماسینا سؤز وئرمک اولار.
About Author
پست های مرتبط
عرفانی دویغو
بایاتی
ادب ساحه سینده