آبا بوخاريني چوخالت‌ـ دئـيه‌جه‌يم‌ـ قوي اوتاق تنديركيمي قيزيشسين!
آنام مني بو حالدا گؤرنده تئز يون كؤينه‌يـيمي گتيريب، مني دانلاماغا باشلاياجاق:
ـ «بالا سنه دئمه‌ديم كي هاوا پايـيزي‌يـيب قيش پالتارلاريني گؤتور؟! هئي دئدين زنگ‌آوانين ماشين يـولو وار، تئز قايـيداجاغام!ـ ايندي جزاندي چك!»
آنام حاقلي‌ايدي: سازاق ايينه- ايينه بدنيمه سانجيليردي. آرخاليـغيمين ياخاسيني قووزايـيب، باشيمي سويوقدان گيزلتسم‌ده، قولاقلاريم شاختادان دوغرانيردي. اللريمي قولاقلاريمين اوستونه باسيب قاچماغا باشلاديم. آرتيق ورزقان جاداسينا ياخينلاشميشديم. «باخ ائله بو تپه‌ني ده آشسام ورزقان اوتوبوسو گؤرونه‌جك».
قارشيدان اسن يـئل، لوت قلمه‌لري اويناديردي. يـئلين قورخوسوندان بئليمي ايكي قات اييب، تپه‌ني ديرمانماغا باشلاديم.
تپه‌نين باشينا چاتان كيمي ورزقان جاداسينا باخديم. گؤز ايشلديكجه اوزانيب گئده‌ن جادادا بير قارالتي‌دا گؤزه توخونماييردي. قيچلاريم سورونه‌ـ سورونه تپه‌ني ائنيب، تورپاق جادانين كناريندا قول‌لاريمي قولتوقلاريما باسيب دايانديم. هرگون ورزقاندان تبريزه تكجه بير اوتوبوس يولا دوشور، اونون‌دا كي، واختي وعده‌سي معلوم اولموردو.
انتظار سويوغون شدتيني داهادا آرتيريردي. يان‌ـ يؤره‌يه گؤز گزديرديم. هئچ بير دالداناجاق تاپا بيلمه‌ديم.
گؤيه باخاندا قارا بولودلارين آرخاسيندا تكجه گونشين سولغون بير ايزي گؤرونوردو. توز تورپاق‌لا سورونن قورو يارپاقلارين سسي، يـئلين سسينه قاريشميشدي. بير اود يانديرماق حسرتي‌له، كيربيتيم اولماديغيـني بيله‌ـ بيله، هئي جيبلريمي آختاريرديم. بيردن جادانين اوتايـيندا، بير تپه‌نين دالداسيندا، بير قويون سوروسونه گؤزوم ساتاشدي! سئـوينجك سورويه طرف قاچماغا باشلاديم. هله سورويه بيرآز قالميش‌ـ كيربيت، كيربيت‌ـ باغيرسام دا، چوبان باشيني بولادي. ـ بلكه ائشيتميرـ دئـيه، بيرآزدا ايره‌لي گئديب، اللريمي گؤزونون قاباغيندا اووشدوراندا، ـ «واليم‌دي »ـ دئدي، ـ سن اودون «نيغ »، «گتيليم » اولاـ تئزـ تئز بيرآز چؤر- چؤپ ييغيب، قورو يارپاقلاري‌دا آلتينا دولدوروب، چاغيرديم. گليب چاتدي! خيرداجا بير اوغلاندير. يون بؤركونون ايچينده شوه كيمي گؤزلري پار- پار پاريلدايـير. ـ آديم خودو دیر ـ دئدي. كيربيت قوتوسونو اليندن آليب آچاركن، يـئريمده دونوب قالديم! قوتودا تكجه بيردانا چؤپ قالميشدي!
بو يـئل‌لي‌هاوادا بو تكجه كيربيت‌له اود يانديرا بيله‌جه‌ييمه مطلق اينانماسام‌دا، اوجاغين ديبينده ديزه چؤكوب، آرخاليغيمي چيخاريب باشيما چكديم. سونرا ايكي قات اوجاغين اوستونه اييلديم. نفسيمي سينمده حبس ائديب، تيتره‌ك اللريم‌له كيربيتي يانديرديم. توسدو آرخاليـغيـمين آلتيني دولدوروب، گؤزلريمي ياشاتمايـينجا آياغا قالخماديم. خودو ايسه باشيمين اوستونده ديك دايانيب، دينمزـ سؤيلمز منه باخيردي. سئـوينجك آرخاليغيمي گئـييب، دويمه‌لريني بركيتديم.
اليمده‌كي بوش كيربيت قوتوسونو، اوجاغا آتماق ايسته‌ينده، خودو چالاغان قوش كيمي بيردن قوتونو اليمدن قاپدي! او منيم تعجب‌لي باخيشيمي گؤرنده باشينداكي ايپ بؤركونو گؤتوروب، اونون قاتيندان بير دسته كيربيت چؤپو چيخاريب، قوتويا دولدوردو. من‌سه تعجب‌له اونا باخاركن، يئريمده قورويوب قالميشديم.
مني بئله گؤرنده، خودونون آغ‌ـ آپباغ ديشلري‌نين آراسيندان چيخان شيرين سؤزلري، اونون شيرين گولوشونه قاريشدي:
ـ «نانديلانماسايدين بيلين‌ده وئله‌جه‌ايديم».
About Author
پست های مرتبط
چطور نام همسر سابق را از شناسنامه حذف کنیم؟
این شما و این هم شگفت‌انگیزترین اولِ مهر تاریخ
یازده حقیقت هشداردهنده که اگر می‌ترسید، نخوانید!