سیگار منی ترگیدیبدیر

هله مدرسه یه کئتمیردیم
ائوده ده آتام درس دئمیشدی اوچونجی کلاسی اوخویوب قورتارمیشدیم؛
بیردانادا گؤزل کیفیم واریدی کیتابلاریمی قویوردوم ایچینه هر یئره قوناق گئدنده اؤزوم ایله آپاراردیم
تئزتئز آتاما دییه ردیم منی یازدیر مدرسه یه اودا دییه ردی بالا هَله سینّین یئتیرمه ییبدیر.
آنجاق بیر گون واختی گلیب یئتیشدی
یازیلدیم مدرسه یه بیر گؤزل مهربان خانیم معلمیم واریدی
اول درسی دئدی سوروشدی کیم بو درسی باشاریر من تئز الیمی قاوزادیم دئدیم من بو کیتابین هامیسین باشاریرام ، چاغیردی سوروشدی:
هاردان سوروشدی بیلدیم
معلم من ایله دوست اولدی
هر واخت معلم گلمه ینده درسی من دئییردیم
مدرسه ده هرایل اول شاگیرد اولاردیم
بیر گون آتام ناخوشلادی آپاردیق دوکتوره ، دوکتور دئدی سیگار اونون آغ جییارین
چورودوبدیر.
آنجاق سیگار آتامی الیمدن آلدی ، داها درسیمه یئتیشن اولمادی
ایکی نفر یولداشیم واریدی ، اولاردا سیگار چکیردیلر.
بیرگون اولار سیگار چکنده بیری بیر لرینه تعارف ائدنده منه ده تعارف ائله دیلر
او بیریسی دئدی: سیگار چکمگه چیخار ایسته ییر ، بو سؤز منیم غئیرتیمه چوخ توخوندی آلدیم بیرینده من آلیشدیردیم ، ائله او بیر سیگار داها یاخامی بوراخمادی
اون بیری اوخویوردوم مدرسه نین تووالتینده سیگار چکیردیم.
بیر گون ناظیم گلیب گؤردی ، منه بیر دوزگون شاپالاق ایلیشدیردی ، اوندا منده قاییدیب ناظیمه شاپالاق آتدیم ، سونرا منی مدرسه دن ائشیگه سالدیلار.
او گوندن بَری فحله لیگه باشلادیم .
بیر گون محلله اوشاقلاری دئدیلر: بیر بانک دا ، ایشچی یازیرلار، بیرگه ییغیشیب گئتدیک ، بیر نفر بیزی دانیشدیرماق ایسته دی ( مصاحبه ائتدی ).
دانیشیق قورتولاندان سونرا چیخدیق ائشیگه ، ائشیگه چیخاندا بیزی دانیشدیران ، سیگارین آلیشدیرماق اوچون بیزدن کیبریت ایسته دی، من تئز فندکیمی چیخاردیم اونا ساری دوتدوم.
ایکی آی سونرا، محلله اوشاقلارینین بیرین گؤروب سوروشدوم: ایشه یازیلماقدان نه خبر؟ دئدی: بیز ایشه گئدیریک. سحر گئتدیم بیزیله دانیشیق آپارانین ( مصاحبه ائده نین ) یانینا دئدیم: منی نییه ایش اوچون چاغیرماییبسان؟!
دئدی: سن گئت سیگار فندکیندن مواظب اوُل ، ایشی نه ائیلیرسن!
گلدیم فحله لیگین دالین دوتدوم. بالابالا ائولنمه ک مَشگینه دوشدوم .
باجیم گیلین قوُنشولاریندا بیر گؤزل قیز واریدی، اونو گؤرنده آز قالیردی روحوم بدنیمدن چیخسین.
آنجاق چالیشیب اونو دانیشدیردیم گؤیول وئردیک کی بیرگه ائوله نک .
بیر گون آنامی ائلچی یوللادیم ، اونلار گلیب محلله دن منی ایچ ائدیب سوروشاندا دئمیشدیلر کی اوغلان سیگار چکیر.
آنجاق قیزین آتاسی سؤز یوللادی کی : من سیگار چکه نه قیز وئرمه رم. داها هر نه قده ر یالواردیم او قیزی منه وئرمه دیلر.
ایندی ده قوجالمیشام ، آسم ناخوشلوغو توتموشام ، من سیگاری ترکیدنمه دیم ، سیگار منی ترکیدیبدیر

About Author

saghi

See author's posts