کاکتوس

کاکتوس لار ائوده ساخلانیلان و سئویملی بیتگی لردندیر کی چوخلاری اونون جور به جور نوعلاریله بزه ک اوچون فایدالانیرلار.
گاهدان ائولرده بو گولون گولدانین چوخ شئحلی ساخلاماقیله بیتگی نین دیبی نین چورومه گینه و اونون آرادان گئتمه سینه باعث اولورلار.
بو نوع بیتگی کئشه لن تورپاغی سئوه ر . و گره کدیر بئلنچی بیتگینین تورپاغی بیر نوع گولداندا اولسون کی لیژله نمه سین، اونا گؤره ده لعابلی ساخسی قابلاردا اکمه ک یاخشی ده گیل.
کاکتوس گولونون خاص تورپاغی ، گره کدیر اونون آنا تورپاغی کیمی اولسون. بئله بیر بیتگی نین تورپاغی گیرگلی باغچا تورپاغیله قوم قاریشیق دیر. و بیر آزدا اصل یئرینده اولدوغو کیمی قورولوغا رغبت گؤرسه دیر .
کاکتوس تورپاغی نین آماده سین ائلییه بیلرسیز گول ساتانلاردان آلاسیز، یادا اؤزوز ائوده جورله یه سیز.
کاکتوس طایفاسیندا کی بیتگی لر اتلی و سولو دیرلار و سویو اؤز یارپاقلاریندا ساخلایا بیلیرلر تا سوسوزلوق چاغیندا اوندان فایدالانسینلار. بئلنچی بیتگی نیبن اصل یئری قورولوق و سوسوز چؤلدور. آمما بعضی لری ده واردیر کی بیر آز یاغینتی اولان یئرده ده بیتیرلر. بو بیتگی ، گونش و ایستی سئوه ندیر. و یاغیش اولمایان یا یاغینتی آز اولان و قورو یئرلرده کی قورو و بارسیز تورپاقی واردیر یاخشی یئکه لیر.
بئله توقّع سیز گولو ائوده ساخلاماق چوخ آساندیر. کاکتوس گولونه او بیر گوللره سایاق تئز تئز سو وئرمه زلــر.
کاکتوس تورپاغی گره کدیر بیر بؤلوم قوم ، بیر بؤلوم باغچا تورپاغی و بیر آزدا « پیت ماس » دان جورله نسین. کاکتوس تئزجه تورپاغین سویون سوُروب اؤز بدنینده ساخلاییر. آنجاق آرتیق سو گره کدیر کئشه لیب تورپاقدان چکیلسین تا بیتگی نین چورومه گینه سبب اولماسین.
کاکتوس گولونون تورپاغین نئجه جورله یه ک؟
اگر اؤزوز کاکتوس تورپاغین جورله مه ک ایسته سه ز ، اونون هزینه سی آلماقدان آز اولار. اگر چوخ قورو یئرده سیز ، گولدانا چوخ « پیت » قاتین، آمما قویمایین بوتونجه قوروسون.
کاکتوس گولون ائوده یا حیاط باغچاسیندا ساخلاماق اوچون ، بیر اؤلچو یویولموش قوم، بیر اؤلچو شن و یا حتّی ساخسی گولدانین نارین سینیقلارین بیر بیره قاتیب اکین!
گولدان تورپاغین ، بیر باشقا سایاقدادا بئله جورله یین:
بئش اؤلچو گولدان تورپاغی ، ایکی اؤلچو « پومیس یا پرلیت » و بیر اؤلچو نارگیل الیافی قاتین .
هاردان بیله ک کی گولدانیمیزین تورپاغی یاخشیدیر؟
بیتگی نین شادابلیغی آرادان گئتمه ک ایله بیلیریک کی تورپاغی دوز ده گیل و تورپاغین ده ییشمه گه باشلاییریق.
آمما بیتگی ناخوشلوغا دوشندن سونرا چوخ یوبانمیشیق. پس یاخشیدیر ایلک زاماندان کی بیتگینی گولداندا اکیریک تورپاغی نین یاخشی اولماغیندا گؤزله یه ک .
اگر کاکتوس ، چوخ قورولوق سئوه ن نوعلارداندیر اوندا ، قوم ، شن و تورپاق بیرگه قاتین. یوخسا بیر آز شئح سئوه ن ( نیمه استوایی ) اولسا تورپاغینا بیر آز « پیت » قاتین!

About Author

saghi

See author's posts