یئمه لی لرین خاصیتی

لب لبی نین فایدالاری

بو یئمه لی ده چوخلو معدنی مواد و ویتامین واردیر. میلاد دان دؤرد قرن قاباق دان بو میوه نی ت انیرلار و بو یئمه لی دن داوا درمان اوچون چوخ فایدالاناردیلار.
چغندر ایکی جوره دیر: بیر جوره سی معمولی چغندردیر کی رنگی قارایا چالیر یادا قیرمیزی دیر کی اونا لب لبی ( لبو ) دئییلیر. و او بیری نوعودا ، قند چغندری دیر کی رنگی آچیق ساری و یا آغا چالمیش دیر.
دونیانین چوخ یئرلرینده قند چغندری شکر جورله مه ک اوچون اکیلیر.
آنجاق چغندر بیر نوع یئمه لی دیر کی اونون یارپاقلاریندان باشقا گؤیلریله بیرگه آش پیشیرنده یا خوروش جورله ینده فایدالانارلار و گاهدان قاتیق ایله بیرگه مئیل ائده رلر.
یاخشی چغندر اودور کی تورپاقدا چوخ قالمایا. چون چوخ قالیب یئتیشن چغندر بَرک اولار. معمولاً قوجا چغندرون بویونو نازیک اولار و اونون اوزونده شیریق یارانار.
خام چغندر بیتگی بالی دیر و تانری آری بالیندان سونرا بو بیتگی ده شفا یارادیبدیر. بئله لیکله آدام چغندرین ده یه رینه چوخ وارد اولور.
ایسته سه ز چغندرین قابیغی راحات سویولسون، ایستی سودان گؤتورون تئز سویوق سویا قویون ، راحاتلیقلا سویولسون.
چغندرین ده یه رلی خاصیتلری بونلاردان عبارتدیر:
– بو یئمه لی نین طبیعتی ایستی دیر.
– جوزام ناخوشلوغون آرادان آپارار.
– عقلی چوخالدار.
– قانین چوخالماسیندا یاردیمدیر.
– قانین دولانماغیندا یاردیمدیر.
– قانی صافالدار.
– قادینلار اوچون فایدادیر.
– قیرمیزی چغندر یا لب لبی ، قانین یاغین آزالدار.
– اوره ک اوچون فایدادیر.
– بویلو قادینلار اوچون یئمه لی و گوج یاراداندیر.
– قانسیزلیغی آرادان آپارماقدا یاردیمدیر.
– لب لبی نین شیره سی ، قره جییه ر ، بؤیره ک و صفرا کیسه سی اوچون فایدادیر.
– لب لبی قارین یوموشالداندیر.
– پئشابا آپاران و « یبوست » ناخوشلوغون درمان ائدن دیر.
– پئشاب یولونون التهابین آرادان آپارار.
– مثانه، وَجئح و ده ری ناخوشلوقلاری اوچون فایدادیر.
– اشتهانی چوخالدار.
– لب لبی ده ، یئر کؤکو کیمی ، « کاروتن » چوخدور و او معده ده « آ » ویتامینینه چؤنور. « آ » ویتامینی بدنین ساغ قالماغی اوچون لازیم اولان ویتامین لردندیر.
– پیشمیش چغندر یئمه ک بدنده تیتره مه گین آرادان گئتمه گینه سبب اولار.
– چغندر یارپاغی دالاغین شیشین آلار.
– چغندریله یئرکؤکو سویو بیرلیکده ، صفرا داشین آرادان آپارار.
– قیشدا لب لبی یئمه ک چوخ فایدادیر. مخصوصاً قوجالار اوچون لاپ یاخشیدیر.
– چغندرین یارپاغین قاینادیب اونون سویوایله باش یوساق ، باشین که په گی و یاغی آرادان گئده ر .
– چاتلاق ال آیاقی چغندر یارپاغی نین ایستی سویوندا قویساق توختایار.
– لب لبی یئمه ک مفاصیل آغری سین آرادان آپارماق اوچون فایدادیر.
– بو یئمه لی ده « آنتی اوکسیدان » واردیر.
– یارپاغیندان یارانی باغلاماقدا و قاباری درمان ائتمه کده فایدالانارلار.
– چغندر شربتی ، فایدالی ایچمه لی لردندیر. بدنی گوجلندیره ر ، بدنین سمّ لرین یووار و قانی دورولدار. چغندر شربتین جورله مه ک اوچون بئله ائدین:
اوچ دؤرد چیی چغندرین میوه ماشینی ایله سویون چه کین و اونو بیر لیوان معدنی سو ایله قاتین !
آییق اولون:
لب لبی ، حددن آرتیق و چوخ یئمه ک معده اوچون زیاندیر و قارینی سانجیلاندیرار. بو موشگولو آرادان آپارماق اوچون لب لبینی ، مَرجی ایله بیرلیکده پیشیرین.
لب لبینی پیشیرنده آلومینیوم قابدا پیشیرمه یین!
قایناق: اینترنت / آفرینش –
چئویره ن: الف.عظیمی بیلوردی

About Author

saghi

See author's posts