یاشیل فضانین گؤرکملی گوللریندن

بو گولو کلمه نین اوخشاری اولدوغونا ، « گازمانیا » گولو ایله عوضی سالمایین. « گازانیا » ایله « گازمانیا » نین فرقی واردیر.
بوردا کی سؤزوموز گازانیا گولونون باره سینده دیر.
گازانیا نین اصل دوغوم یئری ، جنوبی آفریقا ، موزانبیک و تانزانیا اؤلکه لری دیر.
بو گول ، نئچه ایللیک یا همیشه لیک بیتگی لردن دیر آمما سویوق اؤلکه لرده بیر ایللیک اکیلیر.
گوللری ایشیقلی و نارینجی، قیرمیزی ، ساری ، آغ ، حنایی، صورتی و گاهدان بونلارلا قاریشیق رنگ لرده دیر.
بو گولون چوخلو نوعلاریندا گونه وه رده گوللر آچیلیر و گئجه چاغی بوزوشور.
گازانیا ، یازین سون آییندان پاییزین سویوقلاری دوشه نه دک گوله دولار.
بوتون گون ایشیغی ، ایستی هاوا و گوجلو باغچا تورپاغی بو بیتگی اوچون لازیمدیر.
سویوقا دؤزوملوگو آزدیر آمما صفر درجه یه آز زامان دؤزه بیلیر.
بو گولو توخوم و دیبدن آییرماقلا چوخالتماق اولار. گازانیانین توخومون بایراما قیرخ گون قالاندا گول ائوینده ( اون آلتی درجه ایستی ده ) اکیب ، سونرا شیتیل لرین بیر بیر کیچیک گولدانا کئچیب ، بایرامدان سونرا و هاوا ایستی له شندن سونرا اصل یئره اکه رلر.
چوخلو پارک لاردا گازانیا نین اولماغی آیری گوللرین طرحینه بزه ک وئرمک ده یاردیمدیر.
گازانیا گولونون شیتیلین گول ائویندن اصل یئره آپارمامیشدان قاباق او یئری دوزگون و ده رین بئلله ییب هامارلاماق داهادا آرتیق بو گولون قول قاناد آچماغیندا تأثیری واردیر.
گازانیانی شوخوملانمیش یئرده ، اون بئش سانتیمئتیر بیر بیریندن آرا وئرمکله اکیب سونرا دیبلرینه چوروموش پهئن وئره رلر . یایدا هر گون آخشام چاغی بیر دونه سووارماق لازیمدیر.
بو گؤزه ل گولون ، جوربه جور طرح لرده یاخشی یئری واردیر و بو بیتگی دن گؤز قاباغیندا کی باغچالاردا ، پارکلاردا ، ویلالاردا و آپارتمان قاباقلاریندا ( گولدانلاردا ) فایدالانماق اولار.
گازانیا او گوللردن دیر کی یاشیل فضادا اوندان چوخ فایدالانارلار و گوللرین ایچینده خاصّ یئری و ده یه ری واردیر.

About Author

saghi

See author's posts