برکت

علی بن ابی طالب (ع) حضرتلری ، پیغمبر اکرم (ص) حضرتلری طرفیندن ، مأمور اولدو بازارا گئدیب، پیغمبر (ص) حضرتلرینه بیر کؤینک آلسین. گئدیب اون ایکی درهم ده یه رینده بیر کؤینک آلدی و گتیردی . پیغمبر(ص) سوروشدو : بونو نئچه یه آلیبسان؟
– اون ایکی درهم وئرمیشه م
– بونو ائله چوخ سئومه ییرم ، بوندان اوجوزون ایسته یرم. آیا ساتان قایتارار؟
– بیلمه ییرم یا رسول الله!
– گئت گؤر قایتارار؟
علی(ع) کؤینگی گؤتوروب بازارا قاییتدی. ساتانا بویوردو: پیغمبر(ص) بوندان اوجوزلوسون ایسته ییر. آیا حاضیرسن بیزیم پولیمیزی وئریب ، کؤینه گی قایتاراسان؟
ساتان قبول ائتدی و علی (ع) پولی آلیب پیغمبره گتیردی. اوندا پیغمبر (ص) و علی (ع) ایکیسی باهم بازارا ساری یولا دوشدولر. یول اوستونده پیغمبرین گؤزو بیر کیچیک کنیزه ساتاشدی کی آغلاییردی . پیغمبر(ص) یاخینا گئدیب کنیز دن سوروشدو: نییه آغلاییرسان؟
– ائوده منه دؤرد درهم پول وئردیلر و منی بازارا یوللادیلار. بیلمه ییرم نئجه اولدو کی پوللاریم ایتدی . ایندی اوره ک ائده بیلمه ییرم ائوه قاییدام.
پیغمبر، اون ایکی درهم پولدان دؤردین کنیزه وئریب بویوردو: هر نه آلاجاق ایدین ، آل و ائوه گئت! . اوندان سونرا پیغمبر بازارا گئدیب دؤرد درهم ده یه رینده کؤینک آلیب گئیدی و ائوه ساری یولا دوشدی.
بازاردان قاییداندا گئنه او کنیزی گؤردو نگران و کئفسیز اوتوروبدیر و ائوه گئتمه ییبدیر.
– نییه ائوه گئتمه ییبسن؟
– یا رسول الله چوخ یوبانمیشام و قورخورام بو یوباندیغیما گؤره منی وورالار.
– گل باهم گئده ک ، ائویزی منه گؤرسه ت . من تاپیشیریم سنی اینجیتمه سینلر.
– رسول اکرم(ص) کنیز ایله بیرگه یولا دوشدو ، ائوین قاپی سینا یئتیشجه ک دئدی: « بو ائودیر ». پیغمبر(ص) قاپی نین دالیندان اوجادان سسله ندی: ای بو ائوین آداملاری ! سلام اولسون سیزه!
بیر جاواب ائشیتمه دی. ایکینجی دؤنه گئنه سلام دئدی، جاواب گلمه دی. اوچونجو دؤنه سلام وئره ندن سونرا جاواب گلدی: « السلام علیک یا رسول الله و رحمه الله و برکاته »
– نییه ایلک دؤنه جاواب وئرمه دیز؟! آیا منیم سه سیمی ائشیتمه ییردیز؟
– نییه، همان دؤنه ائشیتدیک و تانیدیق کی سیز سیز!
– پس یوبانماغیزین سببی نه دیر؟!
– یا رسول الله (ص) سئویردیک سنین سلامینی دال با دال ائشیده ک . سیزین سلامیز بیزیم ائویمیزه ساغلیق و برکت گتیریر.
– سیزین بو کنیزیز بیر آز یوبانیبدیر. بورا گلدیم کی سیزده ن ایسته یم اونو دانلامایاسیز!
– یا رسول الله(ص)! سیزین موبارک آددیملاریزه گؤره ، بو چاغدان کنیزی آزاد ائله دیم.
– تانری یه شوکر اولسون. اون ایکی درهم ، عجیب آرتیملی پول ایمیش! ایکی آداما پالتار گئیدیردی و بیر برده نی ده آزاد ائله دی.
قایناق: داستان راستان
چئویره ن: الف. عظیمی بیلوردی

About Author

saghi

See author's posts