دئییرلر:
بيرجوت ائركك- ديشي تولكو، بير اوتلو- سولو چؤلده، خئيلك زامان خبرسيز، قارا- قورخوسوز، خورامانجاسينا ياشاييرديلار! گوندوزو آخشاما قَدَر گزيب دولانيرديلار، اوو اَتيندن قيدالانيب، سَرين بولاقلارين سويوندان ايچيب، ياشيل چمنلرده قووالا- قاچدي اويناييب، هَنگيرله شيرديلر! سو قيراغيندا بيتن سويود لرين آلتيندا كؤلگه لنيب دینجه لیرديلر! بوللوقدا- شادليقدا حياتين آنلاريني شيرين شربت كيمي تامسينيرديلار! قوشا گزيب، جوت ياشاييرديلار! جان دئييب- جان ائشيدیرديلر. گئجهلريده، نفس- نفسه اویوردولار! بير بيرينين يولداشليغيندان دويموردولار، كَدرسيز- غمسيز عؤمور سوروردولر. اونلارين گؤزونده دونيا اَمن- اَمان و ياشاييش دا، چوخ شيرينايدي!
گونلرين بير گونونده، پادشاه اؤز ياخين آداملاري و قوللوقچولاريلا، شيكارا چيخدي! اووچولار- جَرگهچيلر، تازي- تولالاريلا، تولكولر ياشاديغي اوولاغي- چؤلو قورويوب دؤورهله ديلر! سود گؤلونده ياشايان خبرسيز تولكولر آرايا سالينيب توتولدولار، دَريلري زدهلنمهسين دئيه، ائحتياطلا اَل- آياقلاري باغلانيب، آرابايا دؤشنميش يوموشاق اوتلارين اوستونده، بير يئرده برابر اوزاتديلار!
غفلت يوخوسوندان اويانان تولكولر، حسرتله بير بيرينه باخيب، برابر كئچيرديكلري شاد گونلرين سونا چاتديغيني و بير بيريندن ابدي آيريلمالاريني دَريندن اينانديلار!
ديشي تولكو ائركهيه دولوخسانيب، دئدي: هئچ اينانميرام داها بيرده كئچميش گونلر كيمي حياتين شَفتيني دادیب تامسینا بيلَك! بو آيريليق سفريدير، گئدر
– گلمز يولودور، بو ايشدن اؤلوم قوخوسو گلير، بو آن وداعلاشما چاغيدير! داهي گؤروشمك چتين، داهي قووشماق چتين! داهي بيتيشمك چتين!
ائركك دئدي: تابلاش، داريخما یولداش، صبر ائت! دوزدوركي ظاهيرده بير بيردن آيريليريق! لاكين بيزي اؤلدورندن سونرا، قيمتلي اولدوغونا خاطير، دَريميزي دیقَّتله سويارلار، اوغوب يوموشالديب يئتيرَرلر، گؤزه گليم بير مفرش كيمي دقّتله بيربيرينه بيتيشديريب تيكرلر، بئله ليكله بيرده بيربيريميزه چاتاريق، ايكي ايستكلي كيمي يئنيدن بیر- بیره قوووشاريق
محرم پریزاد «سورگون»
او سؤزلره گلمز کیتابیندان
محرم پریزاد (سورگون)
پست های مرتبط
عرفانی دویغو
بایاتی
ادب ساحه سینده