آلتميش ياشي قويدوم دالا، آلتميش بيره دوشـدوم
آلتميش بير ايل اولموش، بو جهاندا گيره دوشدوم
شــــــــــــكسيز، منه روزي يازيليب تك لبنيّات
شيت سوددن آنام آچديدا، شور پنديره دوشـدوم
شايدده فلك اؤنجهسي گون روزي يازيرميـــــش
يوللار ترافيك اولدو، قاليب، تأخيره دوشــــدوم
وارلي اوشاغي موز يئدي، نارگيلده دويـــــونجا
منده بير اووج قوردلو- چوروك انجيره دوشدوم
قيش فصلي دوغولدوم، ولي عؤمروم بويو يانديم
بلكه سببي شاختا ايدي تنديره دوشـــــــــدوم؟!
يئرســــــيز دگيل ايپ باغلاييرام چوخلارينا من
اوّلده اؤزوم بنده گيريب، كنديره دوشـــــدوم
تاختا بئشيگ آلميشدي آتام، چئورهســـي زنجير
اون گونلوك ايديم من، او زمان زنجيره دوشدوم
آزادليق اوچون، اسكي- بلكله گولهشيــــــرديم
شؤرتوك بادالاق سالدي، ييخيلديم، زيره دوشدوم
شـــــــــؤرتوك- بلكايله ال- آياق باغلانير اوّل
لاپ دوز دوغولان گون بو آجي تقديره دوشدوم
گويا او زمان چوخلو خرابــــــــكارليق ائديرديم
يوزلر يول آتام حُكم وئريب، تعزيره دوشـــدوم
ظنّيم بـــــــــودو، غرب ائيلهدي فرهنگي تهاجم
چونكي، بو خرابكارليغا بيردن- بيره دوشــدوم
آمريكالي يوزلر كانال، اينتئرنئته لعنــــــــــــت
چونكي، هله قونداق زماني تقصيـــره دوشدوم
نئيلهك؟ يئتيب آلتميش بيره ايندي ياشيم، «آرش»!
مس اولدو قيزيل، شعركيمي اكسيـــــره دوشدوم
حمید آرش آزاد
پست های مرتبط
عرفانی دویغو
بایاتی
ادب ساحه سینده